Abathengi baphoqeka ukubheka imikhiqizo eshibhile kunabayaziyo
Nekhwalithi yaleyo mikhiqizo kayikho ezingeni eliphezulu
ISILINGANISO sakamuva nje sezinga lokwehla kwamandla emali nelokwenyuka - noma ukwehla kwentengo yezidingo zempilo njengezimpahla ezisetshenziswa nsuku zonke nokunye okuthengwa ngamakhasimende - siveza ubunzima obuthwelwe yizakhamizi zaseNingizimu Afrika.
Lesi silinganiso sikhomba ukuthi abantu abahola kancane nabadla imbuya ngothi, yibona abathwele kanzima kunabasezingeni eliphezulu lempilo.
Sikhomba ukuqhubeka kokwenyuka ngesivinini kwesibalo sezimpahla ezisetshenziswa wuquqaba, njengempuphu, isinkwa, ezokuthutha umphakathi - amabhasi ahamba phakathi kwezifundazwe noma amadolobha amakhulu, nezimoto ezingamasekeni.
Intengo yempuphu, eyisidingo esibalulekile emindenini eminingi ehola kancane naleyo ethembele kwisibonelelo sikahulumeni, yenyuke ngesivinini esikhulu nyakenye.
Isilinganiso esisetshenziswayo lapha ngesezinga lokwenyuka kwentengo, hhayi ukwenyuka ngamarandi kwentengo.
Ake ngilinganise: I-Stats SA, okuwuhlaka lukahulumeni oluqoqa luphinde lucubungule imininingwane ngalokhu, ithi isivinini sokwenyuka kwentengo yempuphu nyakenye sicishe safika ku-34%.
Isilinganiso esisetshenziswayo lapha ngesezinga lokwenyuka kwamanani, hhayi ukwenyuka kwawo ngesikalo samarandi noma amasenti.
Izindleko zokuhamba ngezokuthutha umphakathi njengamatekisi namabhasi, zenyuke ngamanani alinganiselwa ku-17% nyakenye.
Ezokuhamba ngamabhasi phakathi kwamadolobha amakhulu, zenyuke ngo-26%.
Izinga lokwenyuka kwentengo kaphethiloli namanye amafutha ezimoto, kube nomthelela omkhulu kulokhu.
Izinga lokwenyuka kukaphethiloli lenyuke ngenani elilinganiselwa ku-23%.
Elentengo yezimoto ezingamasekeni senyuke ngo-16%, okuyizinga elikhulu kunalo lonke kusukela ngo-2008. Elentengo yezimoto ezintsha kalifinyelelanga ngisho kuhhafu welamasekeni.
Lokhu kuyinkomba yobunzima obuthwelwe yizakhamizi, esezizithola ziphoqelekile ukuthi zithenge izimoto ezingamasekeni kunezintsha.
Lesi senzo singagcina sidale ezinye izinkinga, njengokuthi abantu abebengabathengi bezimoto ezingamasekeni, bazozithola bengasakwazi ukumelana nezindleko zazo.
Lokhu kuzosho ukuthi abanye bazogcina sebethenga lezo ikhwalithi yazo esezingeni eliphansi noma bagcine lezo abanazo isikhathi eside.
Enye yezinkinga ngalokhu, wukwanda kwezimoto ezikhipha intuthu emnyama emigwaqweni, ezivame ukuquleka noma nini, zimise ukuhamba kahle kwezinye izimoto futhi zidale nezingozi.
Yisenzo esijwayekile lesi, sokuthi abathengi abazithola bempintshekile emalini, babheke ezinye izimpahla ezishibhile.
Kwezokudla, uma senza isilinganiso; abathengi bayashintsha behlise ingxenye yelayisi abalithengayo badle impuphu.
Kwesinye isikhathi bashintsha inhlobo yelayisi abalithengayo, bathenge kakhulu elibiza kancane, okuvame ukuthi kube yilelo igama lalo elingadumile kakhulu futhi nekhwalithi yalo engekho ezingeni eliphezulu.
Kwezinye izidingo zempilo, izinga lesibalo sezinto ezisetshenziswa ukuzihlanza, lenyuke ngesivinini nalo.
Insipho yokugeza yenyuke ngenani eliwu-22%, izithambisamzimba (body lotion) zona zenyuke ngenani elilinganiselwa ku-18%.
Akwethusi lokhu njengoba uma kubunjwa insipho yokugeza, kufakwa amafutha atholakala ezitshalweni ezaziwa ngokuthi ama-vegetable nezinye.
Intengo yalezi zitshalo nayo yenyuke ngesivinini esikhulu kusukela ngo-2021.
Kujwayelekile ukuthi ukwenyuka ngesivinini kwentengo yomkhiqizo osetshenziswa uma kubunjwa ezinye izimpahla, kugcine sekwenyuse intengo yalowo mkhiqizo.
Lapha singabala ukwenyuka kwentengo yommbila okwenziwa ngawo ukudla kwezinkukhu zomshini.
Okunye okubalulekile ngesilinganiso sokwehla kwamandla emali nokwenyuka noma ukwehla kwezinga lentengo yezinto, wukuthi kuyehluka ngokwezinga lempilo yomuzi ngomuzi, futhi kuyehluka ngokuthi umuntu uhlala ezindaweni zasemakhaya noma edolobheni.
Kwehluka futhi ngamadolobha amakhulu namancane. Ukwehlukanisa ngezinga lempilo kwenziwa ngezikalo zemihholo noma imali etholwa wumndeni ngamunye.
Lapha iStats SA ibumba amaqoqo awu-10 abantu ngokwehluka ngemiholo, kusukela kulabo abathola imali efinyelela ku-R20 140 ngonyaka kugcine ngeqoqo labantu abahola kusukela ku-R312 247 nangaphezulu ngonyaka.
Noma umkhulu umehluko wezinto ezithengwa ngabantu ababumba iqoqo ngalinye, kodwa bathathwa ngokuthi imikhakha yezimpahla abazithengiyo iyefana.