EZOMNOTHO: Uhulumeni uzifake enkingeni ngeyamaholo ezisebenzi zawo
EMUVA kokuzishaya izifuba uthi ngeke uvume ukwenyusa imiholo yezisebenzi zawo ngoba lokho kungabeka engcupheni isimo semali yezwe, uhulumeni kaMnu Cyril Ramaphosa usugcine ugobe uphondo. Lokhu kulindeleke ukuba kudle u-R18 billion, okuyimali uhulumeni ongayihlinzekelanga kwisabelomali esethulwa ngoNhlolanja (February) nonyaka.
Ukugoba kukahulumeni kwenzeke emuva kokungenelela kwabalamuli benhlangano yomhlaba ebhekene namalungelo ezisebenzi, International Labour Organisation (ILO). Kalwethusi nokho ushintsho lukahulumeni ngoba sekunesikhathi ongoti kwezokuphathwa kwemali kahulumeni bexwayisa ngokuthi uhlelo lwawo lokwehlisa isabelomali luzodala izinkinga.
Ngalolu hlelo, uhulumeni uqonde ukunciphisa isidingo sokwandiswa kwemali ebolekwayo ezimakethe zemali. Ukwanda kwale mali kusho ukwenyuka ngesivinini kwenzalo uhulumeni okumele uyikhokhe unyaka nonyaka. Umbuzo-ke uthi usazosigcina yini uhulumeni isethembiso sawo kubatshalimali sokusimamisa isimo semali yezwe?
Lesi sethembiso sisanda kugcizelelwa nguNgqongqoshe wezeMali, uMnu Tito Mboweni ngoNhlaba (May) nonyaka, ngesikhathi ethula isabelomali somnyango wakhe ePhalamende. Wathi uhulumeni waseNingizimu Afrika uyaqhubeka nokulandela umgomo wawo wokuvuselela isimo semali. Waqhuba wathi uhlaka lokuphathwa kwemali kahulumeni lumqoka kangangoba ngeke lushintshwe, waphinde wagcizelela ukuthi isabelomali asimemezela ngoNhlolanja, ngeke senyuswe.
Uma uMnyango wezeMali uzozigcina lezi zethembiso, kuyosho ukuthi zimbili izindlela uhulumeni ongamelana ngazo nezindleko zokwenyuswa kwemiholo yezisebenzi; eyokuqala wukuthi uzoxebula ezabelweni zezinye izinhlelo zawo ukuze ukhokhele izisebenzi; eyesibili, ungasebenzisa imali engatholakala uma kwanda imali yentela ngenxa yokwenyuka kwezinga lokukhula komnotho.
Kunengcuphe kule yesibili njengoba ukukhula komnotho kuncike kakhulu empumelelweni kahulumeni yokulwa neCoronavirus, edala iCovid-19. Kuze kube manje, imizamo kahulumeni kayethembisi ukuthi ukunqontshwa kwaleli gciwane kungaba yinto yalo nyaka.
UMnu Michael Sachs, owayengumphathi wokuhlahlelwa kwesabelomali soMnyango wezeMali, uxwayisile embikweni wakhe ukuthi uma uhulumeni uphumelela ngohlelo lokwehlisa izabelomali, lokho kuyoba wukwehliswa okukhulu kunakho konke osekwenziwa kusukela ngo-1994.
Uthe lolu hlelo lukhulu ngaphezulu kohlelo olwaduma ngeGear (Growth, Employment and Redistribution - olwenziwa wuhulumeni kaMnu Nelson Mandela - olwagcina ludale ukungezwani phakathi kwamadlelandawonye e-ANC - okuyiyona i-ANC, iCosatu neSACP.
Ongoti kwezepolitiki bathi lokhu kungezwani kungesinye sezizathu ezenza iCosatu neSACP beseka uMnu Jacob Zuma ngesikhathi ebhekene noMnu Thabo Mbeki engqugqutheleni eyaduma ngePolokwane ngo-2007. UMnu Mbeki wakhonjwa njengobhongoza weGear.
UMnu Sachs uphinde wexwayisa ngokuthi ukwehliswa kwesabelomali okuhlongozwa wuhulumeni kuzokwehlisa izinga nesibalo sezinsiza zomphakathi, osekuneminyaka zisengcupheni ngenxa yesimo semali kahulumeni.
Wathi lolu hlelo lubhekiswe kakhulu kwezemfundo, ezempilo, ezokuxhaswa kwabampofu ngosizo lwemali nezinhlelo ezibhekene nokulwa nobugebengu nezobulungiswa. Ukwehlisa izabelo zalezi zinhlelo, uhulumeni ubuhlongoza ukungenyusi imiholo yezisebenzi; odokotela, amanesi, izimantshi, izikhulu eziphethe izinkantolo, ojele, othisha nezisebenzi zasemahhovisi.
Izindleko zokuqashwa kwalezi zisebenzi ziwu-70% wesabelo semiholo yezisebenzi zikahulumeni kazwelonke nabezifundazwe. Ngenxa yempi leli elibhekene nayo yokhuvethe ukungenyusi imiholo yezisebenzi zezempilo - okuyizo ezibhekene ngqo nale mpi, - bekuvele kubukeka njengesiphosiso esikhulu.
Ibambene nje impi yamaholo ezisebenzi zikahulumeni kuzwelonke nasezifundazweni, ohulumeni basekhaya nabo babambene ngezihluthu nabezinyunyana, babanga ukwenyuswa kwamaholo. Abezinyunyana bakhala ngokwenyuka kwezindleko zempilo, bathi okuhlongozwa ngomasipala kuzosho ukuthi izisebenzi zabo zizodla imbuya ngothi.
Omasipala bona bakhomba isimo somnotho wezwe, bathi sinciphisa imali abayitholayo ngokuthengisela izakhamizi ugesi, amanzi nenkokhelo yezinsiza ezifana nokuthuthwa kwendle nokuqoqwa kukadoti.
Kwenzeka konke lokhu nje amaqembu ezepolitiki abheke ukhetho lohulumeni ba-sekhaya, olwahlehliswa nyakenye ngenxa yokubheduka kweCoronavirus, osekunqunywe ukuthi lube mhla ka-27 kuMfumfu (October), kodwa kunekhomishana eholwa uMnu Dikgang Moseneke - owayeyiphini lenhloko yamajaji kuleli ecubungula ukuthi kungaqhutshekwa yini nalolu khetho.
Abaholi bamaqembu epolitiki sebetshele le khomishana ukuthi ngokwabo, kumele luhlehliselwe unyaka ozayo. Amaqembu amaningi ahlongoza uMbasa (April) noma uNhlaba (May).
Ukusondela kokhetho kusho ukuthi iqembu elibusayo lingaba sengcupheni uma liqhubeka nokuchukuluzana nabezinyunyana.
Ngakolunye uhlangothi, uhulumeni kaMnu Ramaphosa ungephula izethembiso zawo kubatshali mali uma uvuma ukwenyuswa kwemiholo yezisebenzi ngendlela eyenza ukuthi uhlaka lwesabelo mali olwethulwa ngoNhlolanja, lushintshwe.