KUMINCIWE NGOMJAHO OHLELWA NGUBONGUMUSA MTHEMBU
UBAMBE umoya ngeTraining Run yakhe uBongumusa Mthembu ongomunye wabagijimi abahlonishwayo eNingizimu Afrika.
Lo mjaho kaMthembu ugijinywa minyaka yonke ngoZibandlela (December) phakathi kweMpendle neBulwer. Imijaho eminingi iphazamisekile nonyaka emuva kokubheduka kweCovid-19 esibulale inqwaba yabantu emhlabeni.
UMthembu utshele ILANGA ukuthi sebeke bahlangana nethimba elihlela lo mjaho oyibanga lika60km kodwa kabazange baphume nesinqumo ngawo. Lo mjaho usiza abasubathi ukuzilungiselela ukuqala konyaka omusha.
“Yize sihlanganile ngeledlule kodwa kakukho esiphume nakho ngenxa yokuthi ezokugijima zisamisiwe kuleli. Sinethemba lokuthi kuzoshaya uZibandlela sekuvulwe yonke into. Okuhle ngalo mjaho wukuthi kakukho okuningi okudinga ukwenziwa ukuwuhlela kwazise abasubathi basuke bezoziqeqesha. Uma sekuvulwe yonke into sizophuma nento ebambekayo. Okungijabulisayo wukuthi baningi abasubathi abanentshisekelo yokuzoziqeqesha kule ndawo,” kusho uMthembu.
UMthembu ubuye wazwakalisa ukukhathazeka ngokuhlaselwa kukaNick Bester ongomunye wabasubathi abahlonishwayo emhlabeni kwazise sewake waba yingqwele yeComrades Marathon. UMthembu uthi kubashayisa ngovalo ukuhlaselwa kukaBester eziqeqesha.
UMthembu kuzokuthi namuhla ngoLwesine abe yingxenye yomqhudelwano iBrightRock Battle of the Sports lapho kuzokube kukhona iqembu labagijimi, elabebhola lezinyawo, elabekhilikithi nelabebhola lombhoxo.
Lo mqhudelwano uzokuba seNorthern Cape kanti uhlelwe yiGrinSport ngenhloso yokulekelela uhulumeni ukuba ukwazi ukuthenga izinsiza zeCovid-19. Iqembu ngalinye lizokwenza ibanga lika200km.
Inhloso yale nkampani wukuqoqa imali elinganiselwa ku-R1 million kanti kushone usuku lwayizolo sebenze imali ecela ku-R20 000. Abezokugijima bamelwe nguMthembu, uBruce Fordyce, uDavid Gatebe noBester okuthiwa isikhala sakhe kungenzeka sithathwe nguJenna Challenor waKwaZuluNatal ongene unombolo 5 nyakenye kwiComrades Marathon.
Kwelikanobhutshuzwayo kukhona uSiyabonga Nomvethe, uMathew Booth, uNeil Tovey noTeko Modise. Kwelekhilikithi kukhona uJonty Rhodes, uMakhaya Ntini, uMonde Zondeki noLance Klusener. Kwelebhola lombhoxo kukhona uButch James, uHanyani Shimange, uSchalk Brits noJohn Smit.