ISITELEKA SIBAHLUKANISE PHAKATHI ABANGCWABI
UKHALELE abantu abashonelwe usomabhizinisi ongumngcwabi ngenxa yesiteleka sabangcwabi esiqale ngoMsombuluko, obekulindeleke ukuba siphele izolo ngoLwesithathu ebusuku ngenxa yezikhalo zozakwabo mayelana nemigomo ebekwe wuhulumeni njengoba kubhoke iCoronavirus.
Phakathi kwemigomo ekhalisa abangcwabi, kukhona othi kabasavu-melekile ukuthatha isidumbu ema-khazeni kahulumeni uma bengenawo awabo lapho bezosifaka khona.
Kuyinto eyaziwayo ukuthi abangcwabi abangenawo amakhaza bayaye bambambise izidumbu kozakwabo abanawo. UMnu Ndabe Ngcobo weNdabe Dignified Funerals futhi oyisekela likasihlalo weSouth African Funeral Practitioners Association (Safpa), uthe inhlangano yabo kayiyona ingxenye yesiteleka, yize benezikhalo ezifanayo nozakwabo abangamalungu eNational Funeral Practitioners Association of South Africa (Nafupa SA).
Uthe into ebahlukanisayo yindlela amalungu eNafupa SA aziphakamisa ngayo izikhalo zayo. Ukhalele amakhasimende, wathi beyiSafpa kabahambisani nokuthi kumele kuhlukumezeke abantu abashonelwe ngenxa yesiteleka ekubeni inkinga ababhekene nayo ingaqondene nabo kodwa ibhekene nohulumeni ngqo.
Ukhuluma kanjena nje uMnu Ngcobo, uzakwabo ongumengameli weNafupa SA, uMnu Muzi Hlengwa, uqophe i- video eshiya angalazi egi-giyela othile ambize ngosikhwili phambana nobhoko. Lokhu ukwenze emuva kokuba yena namalungu eNafupa SA begasele emahhovisi kaMnu Ngcobo beyomphoqa ukuba avale, angasebenzi.
UMnu Ngcobo uthi uvule icala ngesenzo sikaMnu Hlengwa nalabo abehambisana nabo ngokumhlasela. Uthe uyibonile i- video eqoshwe nguMnu Hlengwa, wathi kuyacaca ukuthi ubeyiqondise kuyena. Uthe kuyamcacela ukuthi lokhu akusahlangene nesiteleka kodwa kunokungaphezulu angakwazi abakubangayo.
“Isenzo sakhe sikhombisa ngokusobala ukuthi usesempini engingayazi nami ngoba ukube bekusaphathelene nezinkinga zemboni yokungcwaba, ubengeke enze ngale ndlela,” kusho uMnu Ngcobo.
Ekhuluma neLANGA uMnu Hlengwa, uthe bonke abasembonini yokungcwaba kumele babe yingxenye yesiteleka ngoba sithinta bonke aba-ntu.
Ukhale ngokuthi lo mthetho - onqanda abangcwabi abangenawo amakhaza ukuba balande izidumbu - uhlose ukucindezela osomabhizinisi abasafufusa abakule mboni.