NGEKE ISAPHUMA EYAMAGEZA
KUVELE ezibuhlungu kubalandeli beqembu likamasikandi, amaGeza Amahle njengoba ingeke isaphuma iLive DVD yalo eyaqoshwa bukhona ePlayhouse, eThekwini nyakenye ngenxa yezinkinga.
Lokhu kuvezwe nguMnu Vezokuhle Nala waMathole Funerals, okunguyena owayephambili ekuqoshweni kwayo exhase leli qembu okokuqala ngqa liqopha bukhoma.
UMnu Nala uthi kwenzeka amaphutha amaningi ngesikhathi kuqoshwa le DVD, okungamele aphumele emphakathini ngoba azokwehlisa isithunzi saleli qembu.
Usho lokhu nje, yingoba abalandeli bakamasikandi bebelokhu bebuzana ngokungaphumi kwale DVD, leli qembu selihlekwa, kuthiwa lakhohlisa izwe, seliyahluleka wukuyikhipha.
"Kangifuni le DVD ibukwe ngabantu abazobona amaphutha bese belungisa ngawo benze okwabo ngento engiqhamuke nayo. Indlela eshutheke ngayo kayiyona le nto ebengiyifuna,” kusho uMnu Nala.
Uthe enye yezinkinga kube wukuthi abathwebuli bayo kubukeka sengathi kabawuqondi kahle umasikandi, kwazise abanye babo bekungabamhlophe. Indlela athi ishuthwe ngayo, uthi ngathi kwakuqoshwa umculo we- gospel.
“Kangizwani nomsebenzi ongekho ezingeni ngoba kuzokuba khona ozobona Amageza okokuqala ngqa empilweni yakhe bese ehlangabezana nomsebenzi wawo ongagculisi.
"Inhloso yami wukuthi leli qembu lihlonishwe ngokuthi liyakwazi ukucula bukhoma, okuyinto abaculi abaningi kumasikandi abayibalekelayo,” esho.
UMnu Nala uthe lo msebenzi uzoqalwa phansi ngoZibandlela (December) nonyaka usuhlanganiswe nokwethulwa ngokusemthethweni kwe-albhamu entsha yeqembu EzeNdidane, okungelinye lamaqembu angaphansi kwamaGeza Amahle.
Ngesikhathi iqoshwa le DVD kwakugcwele ePlayhouse ngenxa yesasa lokuqoshwa bukhoma emculweni kamasikandi. AmaGeza akhiphe i-albhamu entsha ezinyangeni ezimbili ezedlule ethi, “Dear Msakazi" egabe ngengoma ethi “Jobe”.