UPHELELWE YITHEMBA NGENKOKHELO YAKWA-RAF
USELAHLE ithemba ngokuthi uyoke akhokhelwe imali yakhe yakwaRoad Accident Fund uFunokwakhe Dlamini owayeka ukugijima iComrades Marathon emuva kokushayiswa yimoto ngo-2012.
UDlamini othi kumanje usenesifo sokuwa ngenxa yale ngozi. Uthi akasakwazi okumele akwenze njengoba sekuphele iminyaka ewu-7 ehliswa enyuswa ngabakwaRAF kodwa engakhokhelwa imali yakhe.
Utshele ILANGA ukuthi okumphatha kabi wukuthi njalo uma eselinde ukukhokhelwa, utshelwa ukuthi ifayela lakhe seliphethwe ngomunye umuntu, ngakho kuzomele aqale phansi konke asekwenzile, okuhlanganisa ukuyobona udokotela.
Elandisa ngokwenzeka ngelanga lesigameko, uthi ngoMbasa (April) 2012, wayephuma emsebenzini eyozilolongela ukugijima omunye umqhudelwano.
Uthi imoto yamshayisa waphuka unyawo, walimala kanzima nasekhanda, okwenza wahlala isikhathi eside esibhedlela.
“Emuva kokudedelwa esibhedlela, ngaya kwaRoad Accident Fund ngafaka isicelo njengoba ngangingasakwazi nokusebenza emuva kokulimala. Umuntu enganikezwa yena ukuba asebenze ifayela lami, wangiyisa kudokotela owaveza ukuthi ngalimala kangakanani nanokuthi senginesifo sokuwa.
“Kwathiwa mangilinde konke sekumi ngomumo. Kwadlula izinyanga ngingatshelwa lutho ngaze nganquma ukuya khona ngiyobuza ukuthi kwenzekani, ngatshelwa ukuthi ifayela lami selinikezwe omunye umuntu.
“Ngithe uma ngiya kuyena lowo owayesephethe ifayela, wangitshela ukuthi kuzomele siqale phansi siye kudokotela. Uma ngingaphosisi, bathathu abantu asebenikezwe ifayela lami.
“Omunye wabo ngathi uma ngimshayela ngifuna ukuzwa ukuthi kuqhubekani, wathi akasahlangene nefayela lami ngingaphinde ngimshayele ucingo,” kuzikhalela uMnu Dlamini.
Okhulumela iRAF, uNkz Nomkhosi Gumede, uthe njengamanje kulindwe umbiko ovela kwiclinical psychologist okuzothi uma usufikile bese udaba ludluliselwa kungoti ozobheka inani lemali bese eyaziswa uDlamini.