ZIZOHLUKA IZIVIVINYO KULO NYAKA

LIZOGAYA ngomunye umhlathi mayelana nokubhalwa kwezivivinyo zokuphela konyaka ezikoleni kulo nyaka njengoba uMnyango wezeMfundo wenze uhlelo olusha oluqondene nalo nyaka kuphela, okuzobhala uGrade-12 wodwa izivivinyo ezijwayelekile zokuphela konyaka.

Umqondisi wezokubhalwa kwezivivinyo nokuqondiswa kwe- curriculum KwaZulu-Natal, uDkt Barney Mthembu, uthi kulo nyaka ukuhlolwa kwabafundi kuzohluka kokujwayelekile.

Uthi abafundi bazohlolwa ngomsebenzi omncane abawenzile, okuzothi ekupheleni konyaka babhale ama- controlled test, okungaba yiproject noma i- assignment.

Uthi ngokujwayelekile uma kuhlolwa abafundi, umsebenzi obhekwayo wonyaka wonke obizwa ngeSchool Based Assessment, kuthathwa kuwona u-25% wamaphuzu, u-70% kube ngowezivivinyo zokuphela konyaka.

Uthi kulo nyaka kuzothathwa u-60% womsebenzi wonyaka bese kubhekwa u-40% wokuvivinywa okuncane okuzokwenzeka ngoLwezi (November).

“Kuzokhumbuleka ukuthi iCovid-19 iqale sesiwenzile umsebenzi wesigaba sokuqala sonyaka, okusho ukuthi abafundi bazohlolwa kulokhu okuncane abakwenzile okubalwa umsebenzi wesigaba sesithathu nesesine, kwazise esesibili kasenziwanga.

“Sekuyothi umsebenzi osalile wakulo nyaka uqedelwe ngonyaka ozayo,” esho.

Uveze ukuthi abafundi bakwaGrade 10 no-11 kwehlukile okwabo. Uthe izivivinyo zakwaGrade 10, akuvumelekile zeqe ehoreni, futhi zizohlanganisa umsebenzi ofundiwe wezigaba ezintathu.

Utshele ILANGA ukuthi njengoba iphepha leEnglish lihlukene izigaba ezintathu, eleMaths lihlukene izigaba ezimbili, kulo nyaka ngeke abhalwe wonke ngokwehlukana kuzokwenziwa iphepha elilodwa esifundweni ngasinye.

Uthi kusukela kwaGrade R kuya kuGrade-3, kuzothathwa umsebenzi wezigaba ezintathu uhlanganiswe bese uhlukaniswa kathathu kuphume imiphumela yomfundi yokuphela konyaka.

UGrade 4 kuya kuGrade 9 kuzothathwa u-80% womsebenzi wonyaka abafundi benziswe u-20% okungaba yiassignment.