BATHATHU ABAGAQELE ESOKUPHATHA IBSA E-KZN
SIGAQELWE ngabantu abathathu isikhundla sokuba yimenenja yeBoxing South Africa (BSA) KwaZulu-Natal esavuleka ngemuva kokushona kobesiqhoqhobele uFrancis Manning.
UManning washona ngemuva kokuxinwa wukugula ngoMbasa (April) kanti wayengene esikhaleni sikaLes Andreason obesewenze lo msebenzi iminyaka eminingi. Leli phephandaba lithole ukuthi abafake izicelo nguZandile Malinga, uSipho Zondo no-Eric “Slovas” Khoza.
UZandile ungumnikazi wenkampani ehlela izimpi esifundazweni, iStarline Promotions. Kakwaziwa ukuthi kuzokwenzakalani ngeStarline uma eqokwa kulesi sikhundla.
UZandile ubekade engusihlalo weKZN Boxing Association kanti uzinze eMnambithi.
UZondo wasoLundi uyisisebenzi seBSA njengoba engunompempe abuye abe yijaji. UKhoza ozinze eLamontville naye wenza umsebenzi ofanayo noZondo.
Oyi-CEO ebambile kwiBSA, uCindy Nkomo ukuqinisekisile ukuthi sebeqedile ukwenza inhlolokhono kodwa sekulindwe ibhodi ukuba lithathe isinqumo.
Umsebenzi wokuba yimenenja yeBSA wukuqinisekisa ukuthi ophromotha bayayilandela imithetho uma befaka izicelo zokuqhatha izimpi. Okunye wukuqikelela ukuthi amabhokisa ayawavuselela amalayisense nalabo abasuke bevela esigabeni sama-amesha ukuthi bangena ngendlela efanelekile yini esibhakeleni esikhokhelayo.
UNkomo usabanjisiwe kulesi sikhundla ngoba kwesula isigubhukane uTsholofelo Lejaka kanti sekulindwe uNgqongqoshe WezeMidlalo uNathi Mthethwa ukuba aqoke isikhulu esisha.
Sekukhona ukukhuluma okuthi kumele kufakwe uLovemore Ndou, owayengumshayisibhakela kodwa ozinze e-Australia.
Kuthiwa isipiliyoni anaso nokuba yisifundiswa kungenza isithunzi sesibhakela sibuye. Njengamanje abaxhasi bahambela kude nalo mdlalo kuhle kwelanga lasebusika.
UNdou, owake wahlabana ngamabhande e-IBF junior welterweight nawe-IBO, uqhoshe ngeziqu eziyisikhombisa kanti usefundela i-Phd kwezomthetho.
Unenkampani yabameli ezinze eSydney, e-Australia. Kunombono othi iBSA idinga umuntu ozozinza kulesi sikhundla aphinde alalele izikhalo zamabhokisa.
Le nhlangano ivamise ukuba nebhadi lokushiywa yizikhulu eziphezulu ingakapheli iminyaka eyisihlanu ezisuke zinikwe yona.
Abanye abenze njengoLejaka nguMava Malla, uDumile Mateza, uKrish Naidoo, uBongani Khumalo noMoffatt Qithi.