ITHEMBA NGOKUSIMAMA KWEZOKUVAKASHA
UKUQALA kwehlobo kunike uNgqongqoshe wezokuVakasha KwaZulu-Natal, uNkk Nomusa Dube Ncube ithemba lokuthi lo mkhakha uzosimama njengoba ushayeke kakhulu selokhu kwavalwa izwe mhla ka-26 kuNdasa (March) nonyaka ngenxa yokubheduka kweCoronavirus.
UNkk Dube uzwakalise lokhu ngoMgqibelo ngesikhathi ethula ngokusemthethweni inyanga yezokuvakasha KwaXolo, ngaphansi kukaMasipla u-Ugu. Ukwethulwa ngokusemthethweni kwale nyanga kuvame ukwenziwa ngesonto lokugcina likaNcwaba (August) kodwa ngenxa yesimo umhlaba obhekene naso, kuphoqile ukuba izinto zenzeke ngendlela ehlukile.
Uvumile ukuthi lo nyaka uwushaye kakhulu lo mkhakha, wathi uhlelo lokuwuvuselela seluqalile. Uzwakalise nethemba lokuthi ezokuvakasha zisengabuyela ekubeni ngenye yezimboni ezithuthukisa umnotho waKwaZulu-Natal.
Lesi sifundazwe sigabe ngezindawo ezinothile ngezokuvakasha, kusukela emabhishi aso asezingeni lomhlaba kuya eziqiwini ezigabe ngezilwane ezinhlanu ezinkulu emhlabeni nomlando wesizwe samaZulu esihlonishwayo cishe emhlabeni jikelele.
UNkk Dube Ncube uthe indawo yaKwaXolo ingenye yezindawo anethemba lokuthi ngaphandle kwemigede eheha izivakashi, umphakathi usengahlomula ngezindlela ezahlukene ngayo.
Umemezele ukuthuthukiswa kwesikhumulo sezindiza saseMargate osekuqalile. Uthe nakuba besisebenza lesi sikhumulo, kodwa besisebenza ngokusemazingeni aphansi njengoba bekuyindiza esuka iya eGoli kuphela ebivumelekile. Uveze ukuthi uma sekuphothuliwe ukuthuthukiswa kwaso, sizolungela ukwamukela nezindiza eziqhamuka nakwezinye izindawo.
Indawo esogwini oluseningizimu yeKwaZulu-Natal ingenye yezindawo ezihamba phambili ngezokuvakasha njengoba igabe ngamahhotela agudle ulwandle, yizindawo zokuphola, ezokutshuza nezitshalo ezingajwayelekile.
IMeya yo-Ugu, uMnu Sizwe Ngcobo, ithe kuyabajabulisa bewumasipala ukuthuthukiswa kwesikhumulo saseMargate ngoba ngaphandle kokuthi sithuthukisa umnotho, kuzovuleka namathuba emisebenzi kubantu.
Le ndawo ike yaba sematheni ngenkinga yamanzi njengoba kwaze kwaphoqa ukuba imiphakathi ibhikishe, ivale nemigwaqo. UMnu Ngcobo uthe inkinga yamanzi bayayilungisa kanti banethemba lokuthi njengoba kuqala ihlobo nje, izimvula zizosiza ukusimamisa amadamu ukuze babe namanzi anele emphakathini.
Uthe bewumasipala sebekulungele ukwamukela izivakashi eziqhamuka emhlabeni jikelele. Ukhuluma kanje nje uMnu Ngcobo, kuleli sonto kulindeleke ukuba uMengameli Cyril Ramaphosa akhulume mayelana nokuxegiswa kweminye imithetho ehambisana nokunqanda ukubhebhetheka kweCoronavirus.
Umkhakha wezikaqedisizungu ungomunye weneqhaza elibalulekile kwezokuvakasha.