UFUNA U-R50 000 OKAMASIKANDI ODLELWE INGOMA
UTHWALISE umndeni wakhe usizi umculi oyivukana ozishuthe i- video elingisa ingoma yomculi kamasikandi, wayifaka kuYouTube, okumanje kufuneka akhokhe inhlawulo ka-R50 000 ngalesi senzo.
Ukhala nezinyoni uNkk Stheni Ndlovu, ongunina kaSphelele “Nkunzebomvu” Ndlovu, othathe ingoma kaSeluleko “Dumakahle” Nkosi, ethi “Uthando Lwakudala” wayilingisa, wayifaka kule nkundla - yize izwi eliculayo kungelikaDumakahle.
Le ngoma kaDumakahle iphume emasontweni amathathu adlule. UNkk Ndlovu uthi akazi ukuthi le mali efunekayo uzoyithathaphi, kwazise kwayena akaze ayibambe ngesandla.
“Ngibhekane nengcindezi ngaze ngaya emtholampilo ngingasaphilile ngenxa yale ndaba. Ngithe okungcono mabayithathe le ngane bayibophe ngoba kanginayo imali, noma bayithathe bacule nayo bengayiholeli kuze kuhlangane le mali efunekayo, kube yiyona indlela yokukhokha.
“Kangikaze ngizitshele empilweni yami ukuthi ngiyoke ngibhekane nezinkantolo, impela ukuzala lokhu kuyinkinga,” kusho uNkk Ndlovu.
Uthi indodana yakhe iyawuthanda umasikandi, beyinothando lokuxhumana noDumakahle kodwa kungenzeki, yabe isibona kuyindlela engabadibanisa ukwenza le video.
UNkunzebomvu usebenzisana nomunye umculi kamasikandi obizwa ngoSmomoza. UDumakahle utshele ILANGA ukuthi lokhu okwenziwe nguNkunzebomvu kulimaze umculo wakhe ngoba ubengakayiqophi yena i- video yale ngoma. Uthi abantu badidekile njengoba ezinkundleni bazitshela ukuthi le ngoma ngekaNkunzebomvu.
“Abaphathi bami babone kukuhle kusebenze umthetho kulolu daba ngoba phela yena useyahlomula ngomculo wami nakuba umndeni wakhe uxolisa ufuna kukhulunyiswane mayelana nesinxephezelo,” kusho uDumakahle.
UNkunzebomvu uthe ubengazitsheli ukuthi ukushutha kwakhe i- video kuzombeka esimeni esibucayi. Utshele ILANGA ukuthi okwamanje usafunda uGrade 10 eLangazile Secondary, eGoli, kodwa udabuka KwaMajozi, eMsinga.
“Empeleni nginesifiso sokwenza iqembu lami nami, lokhu bengingakwenzi ngenhloso embi futhi kawukho umholo wemali engiwenzile. Ngixolisile kuDumakahle ngokusemandleni, kodwa bangifaka abameli,” kusho uNkunzebomvu.
Isazi sezomculo, uTshepo Nzimande weZuz’muzi Music Production, uthe lokhu kuyicala elibomvu. Uthi umculi obhekene nale nkinga kufanele axhumane nabezinhlaka ezifanele ivalwe le video. UMnu Wiseman Ngubo weComposer, Author and Publishers Association (Copaso), okuyinhlangano enemvume yokugada umculo wabaculi isebenzisana nezinhlaka zokuthengiswa kwawo online, uthi buyagwemeka ubugebengu babantu abadla amandla amaciko nakuYouTube.
“Uma kubhaliswa ingoma ezinhlakeni ezifana nalezi, ikhona indlela yokuvala ukuthi kungabikhona ohlomula ngaphansi kwegama lakho. Thina-ke sinelayisense esebenzisana nawo uYouTube egada zona izinto ezinjena,” esho.