LUZONQUNYWA KUSASA OLOKUFIHLA UMNU MSOMI
UMNDENI wengqwele kwezeshashalazi, uMnu Welcome Themba Msomi (76), ( osesithombeni) edlule emhlabeni ngoLwesihlanu, udalule ukuthi ibisiphila kanzima ngezinsuku zayo zokugcina.
UMnu Msomi owaduma kakhulu ngomdlalo weshashalazi othi “UMabatha” owazungeza umhlaba wonke ngeminyaka ka-1970 - owawuthathelwe kuMacbeth okwakuwumdlalo kaWilliam Shakespeare okuvela ukuthi waqala ukudlalwa esiteji ngo-1606 - ushone emuva kokugula isikhathi eside ekubo kwa-E, eMlazi.
Lo mdlalo kaMnu Msomi wawudla ubhedu nangeminyaka ka-1990 eThe Playhouse, eThekwini. Ushona nje ubelahlwe ngamacala okukhwabanisa imali yamaciko amadala ewu-R8 million, ayeyinikwe ngaboMnyango wezobuCiko namaSiko.
Bekulindeleke ukuba ayokwemukela isigwebo sakhe eNkantolo yeMantshi yasePalm Ridge, eGoli mhla ka-30 kuNhlangulana (June) kodwa akakwazanga ukuya ngenxa yobuthaka bempilo.
ILANGA livakashele kwaMsomi lapho lixoxe khona namalungu omndeni wakhe okubalwa kuwona udadewabo, uNkz Jabulile Msomi, umshana uSiphosethu Msomi noThandi Msomi, naye ongumshana.
Athe uMnu Msomi udlula emhlabeni nje, ubengasakwazi ukukhuluma nokuhamba ngenxa kokuphathwa wuhlangothi, wumdlavuza nezifo eziyamene nesikashukela.
Athe ubuye eGoli wayohlala kubo ngo-2018, kanti amacala athweswa wona amngenele esevele ekubo eMlazi.
“Mhla lulunye kuNhlangulana, uke wawa embhedeni samphuthumisa esibhedlela eMshiyeni, odokotela bathi akalimalanga kakhulu, bambhandisha sabuya naye,” kusho uNkz Msomi.
Kuvele ukuthi wayeganwe nguNkk Soso Nomantithi bathola abantwana ababili behlukana, waganwa nguNkz Thuli Dumakude bathola abantwana ababili behlukana, waganwa nguNkz Gugu Mlambo okungazekanga ukuthi kwenzekani ngoba uMnu Msomi wabuyela kubo ngo-2018 engasayiphathi eyakhe.
Indodana endala kamufi, uMnu Sibusiso Msomi, ithe: “Thina bantwana bakababa uMsomi siyakhala futhi siyamthanda naphezu kwazo zonke izinto ebezishiwo ngaye, okusalayo ungubaba wethu sizomfihla ngesizotha esimfanele.
"Ngiyethemba ukuthi sonke siwumndeni siyovumelana ngokuthi afihlwe KwaZulu-Natal, usuku nendawo sizolunquma ngoLwesibili.”
Umufi uke wahlabana ngezindondo emikhakheni eminingi yezikaqedisizungu engumdidiyeli osezingeni lomhlaba.