UVULE IKHASI ELISHA EMLANDWENI USHENGE
MHLELI: Kumele simbonge uMvelingqangi osenze saphila ngesikhathi esifana nalesi.
Yize ngisengumuntu omusha ngokweminyaka, kepha ngithi uNkulunkulu ungibusisile ukuba nami ngiphile kulesi sikhathi lapho umlando uziphinda, uNdunankulu kaZulu wonkana, iNkosi (Mangosuthu) Buthelezi, uMengameli we-IFP evula ikhasi elisha lomlando lapho emenywa khona eZambia yisizwe sabeNgoni, noMnu Kenneth Kaunda owayengumengameli wakuleliya lizwe.
Ngikhuluma ngokuphinda kuhlangane izishabasheki okwakuvele kusemizweni nasemthanjeni yazo ukuba isizwe esimpisholo sikhululeke, siphile ngokunethezeka. Shenge, kwabanonembeza oneqiniso kufanele ukuba namhlanje bayakuvuma ngokukhathalela izwe lakho.
Inkulumo yakho ohlale uyikhuluma kithina igcwalisekile, nabebephika ngoba befunzwe imfundisoze ngendima yakho owayikhathula ukuze kukhululeke iNingizimu Afrika, namhlanje inkukhu inqunywe umlomo kubona.
Mina ngikubiza ngenhlanhla kimina ngoba ubaba uCleopas Nsibande (owayengumholi kaKhongolose), wayeke wayisho sisenkonzweni yesikhumbuzo sikaMfu Celani “CJ” Mthethwa - engathengi amehlo akho Shenge njengoba wawungekho lapho Ndabezitha (sasiseCity Hall, eGoli).
Wayekusho ethi kuhle lo mlando siwazi siyintsha, lapho kwakukhona nabanye abaholi bakaKhongolose nabeNkatha. Wayeqhakambisa iqhaza lakho elihle elisiholele kwiNingizimu Afrika ekhululekileyo yize kwakungelula.
Namhlanje nababenokungabaza ngokusunguleka kweNkatha yeNkululeko yeSizwe bazizwele, okanye kukhanye bha ukuthi kayisungulwanga kuxatshenwe futhi kungazwenwe, kepha kungenxa yokulwela isizwe esimpisholo.
Amazwi akhulunywe/abhalwe owayengumengameli waseZambia, ahlale ngqo kohlale ukusho. Shenge sincoma ukugcizelela kwakho ukuba kuhlonishwe iphalamende lapho sesiphethwe ngomengameli abampisholo. Ngempela Shenge enye yezinto ozibeka phambili, okuwukwamukelana sibe munye, sehlukene, zikhanya bha okwenhlamvu yelanga.
Isimemo saseZambia ositholile akuyona into encane. Ngicela inkulumo ebhalwe phansi kaMnu Kaunda ihunyushwe ngezilimu zonke zaseNingizimu Afrika, ifakwe emaphepheni ngokwehlukana kwawo. Shenge, uJehova asigcinele wena, kuningi osazosikhanyisela kukho siyintsha yaseNingizimu Afrika.