ABAGIJIMI BASE-KZN BAZOGADULISANA KWI-BIG HILL 21KM
Fiorentina vs Empoli 16h00. Cagliari vs Napoli 19h00. Roma vs Genoa 21h30 NGOMSOMBULUKO Atalanta vs Lazio 21h30. NGOLWESIBILI Bologna vs Milan 21h30. ABASUBATHI baKwaZuluNatal bazokhiphana inkani kwiBig Hill Run 21km no10km ngeSonto kusuka ngo-6 ekuseni eBallito.
Lo mjaho uhlelwe yiDolphin Striders kanti wandulela iBongumusa Mthembu Training Run 60km ezokuba mhla ka-29 kwephezulu isukela eMpendle isongwe eBulwer okuzokuba wumjaho wokugcina wezokugijima esifundazweni nonyaka.
IBig Hill ngomunye wemijaho enzima kakhulu njengoba unezintaba eziqwalwayo kanti kulindeleke ukuba abasubathi besifundazwe baphelele ngobuningi babo kuwona njengoba kuyiwona kuphela okhona ngale mpelasonto esifundazweni.
Abasubathi abazokwenza kahle kulo mjaho bazothola imiklomelo enhlobonhlobo. Abafuna ukuba yingxenye yawo bangaxhumana noZeldi kwethi: 071 422 0953.
Abasubathi baseNingizimu Afrika bazokhiphana inkani kwiHeroes Marathon ngeSonto e-Eastern Cape. Lo mjaho uzosukela emzini kaNelson Mandela oseQunu usongwe eMthatha. Lo mjaho oklomelisa ngezimoto ezingqweleni, uzokube uhambisana ne-21km, 10km ne-5km Fun Run.
Kuwo kubhekwe uNkosikhona Mhlakwana waKwaZulu-Natal ukuba asivikele ngempumelelo isicoco sakhe. Ekhuluma naleli phephandaba ngeledlule uMhlakwana, uthe uzimisele ngokusivikela isicoco sakhe kulo mjaho.
Kusenjalo, iKwaZuluNatal Athletics (KZNA) yazisa abasubathi ukuthi liyavalwa ihhovisi kusasa ngoLwesihlanu. Lizovulwa ngomhla ka-7 kuMasingana (January). Ihhovisi livalwa nje, kushaye isikhathi sokuloba kusemnyama kubasubathi abanqobe iMandela Day Marathon ebingoNcwaba (August) ihlelwe wuMgungundlovu Municipality.
I-KZNA itshele ILANGA ukuthi zonke izinto izidlulisele kwaboMgungundlovu.