Isizoba nomunxa ozimele i-reggae kumaSama
INIKWA isithunzi yiRiSA engabahleli beSouth African Music Awards (SAMA), i- reggae egqozayo emisakazweni eNingizimu Afrika, okwenza ukuba babe yidlanzana abagcina bevelela.
Ukungezwakali kwalo mculo emisakazweni, akusho ukuthi abaculi bawo abawukhiqizi. IRiSA isungule umunxa ozobhekekelela lolu hlobo lomculo emcimbini wangonyaka ozayo. Ngokusho kwayo, ibone kungcono ukuba lo munxa uqale ukuzimela ukunikeza lo mculo isithunzi osifanele.
Phambilini i- reggae ibingena emunxeni weBest R&B/ Soul and Reggae Album. Kusukela ngonyaka ozayo isizozimela ngaphansi komunxa weBest Reggae Album. Ezinye izinguquko ezimenyezeliwe ngoweBest Kwaito/ Gqom/ Amapiano Album, lo munxa ungena esikhaleni seBest Kwaito Album okuphelayo ngayo noweRest Of Africa wona ongena esikhaleni seBest African Artist.
Kulo munxa kuzobe kuvuleleke abaculi abaqhamuka emazweni ase-Afrika kodwa abagila izimanga eNingizimu Afrika ngomculo wabo. Abaculi bayakhunjuzwa ukuthi ukungenela amaSAMA kuvuliwe kulabo abakhiphe umsebenzi wabo phakathi komhla ka-1 kuNhlolanja (February) 2018 kuya ku-29 Masingana (January) (2019.
Isikhulu esiphezulu seRiSA, uMnu Nhlanhla Sibisi, sithe kuhlale kusemqondweni wabo ukwenza izinguquko ezizohambisana nesikhathi emculweni. “Kubalulekile ukuba sihambisane nesikhathi njengoba sibona umculo ukhula futhi uthatha elinye igiya,” kusho uMnu Sibisi.
Ngonyaka ozayo umcimbi wamaSAMA uzobe ugubha iminyaka ewu-25 wasungulwa. I- reggae inikwa leli thuba kumaSAMA nje, i-United Nations (UN) isanda kumemezela ukuthi lo mculo isiwufake ohlwini lwezinto okumele zigcinwe njengamagugu omhlaba ngaphansi kwe-UN Educational, Scientific and Cultural Organization (Unesco).
I- reggae iqale eJamaica ngokusombuluka kwe-1960. Kugqame abantu aba-njengoLee "Scrachy" Perry, uJohn Holt noJoe Higgs owayesebenzisana ne-Wailers eyayakhiwe nguBob Marley (Robert Nesta Marley), Peter Tosh (Winston Hubert McIntosh) noBunny Wailer (Neville O’Riley Livingston) nezinye izinsizwa ezazishaya izinsimbi.
UHiggs nguyena owabhala ingoma kaTosh yodumo ethi Stepping Razor.
Isigqi salo mculo sise-Afrika, ikakhulukazi enyakatho-ntshonalanga yayo. Uzalwa yi- mento - okuwumculo wendabuko eJamaica, yi- ska ne- rock steady, wacosha nakwezinye izigqi zaseCarribean njenge-calyspo edume eTrinidad and Tobago. Uthathile nakwi- rhythm and blues ne- jazz. Nayo i- reggae isizele eminye imiculo okubalwa kuyona iDance hall neRaggamuffin.