Liloliwe izembe kubadlali beChiefs
UMiddendorp yindoda engabibiyeli, efuna umsebenzi
UZOFAKA izembe kubadlali ababona bewuvucu kwiKaizer Chiefs u-Ernst “Mazinyo.com” Middendorp ongumqeqeshi omusha wale kilabhu.
Kuputshuka ukuthi kunabadlali asetshele abaphathi bale kilabhu ukuthi kuzofanele baqale ukubalungiselela indlela ephumayo ngoba akababoni bengena esitayeleni sakhe.
IChiefs izobhekana neSuperSport United kowe-Absa Premiership ngoLwesithathu ngo-19h30 eMbombela Stadium.
IChiefs iya kulo mdlalo nje, ngoLwesihlanu ikhombe indlela uGiovanni Solinas wase-Italy obengu-mqeqeshi wayo nomsizi wakhe uPatrick Mabedi, ikhala ngokugqoza kwemiphumela. Ibe isibuyisa uMiddendorp waseGermany obe-ngusomaqhinga weBangkok United yaseThailand.
Kuvela ukuthi iChiefs izama ngawo wonke amandla ukutholela lo mqeqeshi amaphepha amgunyaza ukusebenza kuleli ngokushesha ngenhloso yokuthi ahlale ebhentshini kulo mdlalo weSuperSport. Nokho uma kuwukuthi akawatholi amaphepha, kuzohlala ebhentshini u-Arthur “10111” Zwane osengumsizi wakhe.
Leli phephandaba lithole ukuthi uMiddendorp ukubeke kwacaca kubaphathi ukuthi kunabadlali azobakhulula ngoba akaziboni ebasebenzisa. Phakathi kwalabo badlali kungabalwa uPhilani Zulu, uGustavo Paez noBernard Parker.
Lo mthombo uthe: “UMiddendorp akabibiyeli, uthe efika nje wabe etshela abaphathi ukuthi uPaez, uZulu noParker kuzofanele basebenze kanzima ukuze abadlalise ngoba akababoni bengena ebholeni afuna ukulidla-lisa. UZulu vele ubengamuzwa besekwiMaritzburg United.
“Nokho akasho ukuthi ngeke abadlalise, ufuna benyuse amasokisi. Inkinga kaMiddendorp wukuthi akambuluzi, uma engakuzwa akafihli. Kuzokhumbuleka ukuthi waxosha uJabulani Ncobeni kwiMaritzburg wasayiniswa yiCeltic. Kuthe angaqashwa yiCeltic wacela abaphathi ukuba angamfici uNcobeni, nangempela yamdedela. Kusazoshuba kwiChiefs, uthembisa ukuzokhuculula lonke uvucu ayiqale kahle kabusha.”
Lo mqeqeshi eshayelwa yileli phephandaba, uthe okwamanje akakagunyazwa ukukhuluma nabezindaba. Nokho akakufihlanga ukuthi mukhulu umsebenzi omhlalele.