KUDUNGUZELE IRANDI NGESINQUMO SE-ANC
SIGQEME irandi inkambabeyibuza isimemezelo sikaMengameli Cyril Ramaphosa asenze ngoLwesibili ebusuku sokuthi i-ANC izimisele ngokuguqula umthethesisekelo ukuze wesekele ukuthathwa komhlaba ngaphandle kwesinxephezelo.
Lokhu kutatazelise osomnotho baseNingizimu Afrika.
Usomnotho, uMnu Wichard Cilliers weTreasuryOne, ekhuluma emuva kwalesi simemezelo sikaMnu Ramaphosa, uthe sifana nokugqema umnotho wakuleli ingozi engeqiwa ntwala njengoba isimo sezomnotho bese siqala ukulunga.
Phambilini i-ANC ithe ukuthathwa komhlaba ngaphandle kwesinxephezelo kuzokwenziwa ngendlela engeke idunguzelise umnotho, kakhulukazi kwezolimo.
“Njengoba imakethe ibisibheke ekutheni irandi libe ngaphansi kuka-R13 00 [uma liqhathaniswa nedola laseUnited States of America - (USA)], lezi zindaba (zikaMnu Ramaphosa) ziligqeme inkambabeyibuza,” kusho uMnu Calliers izolo ngoLwesithathu ekuseni.
Uthe lesi senzo seANC sibukeka simumethe ipolitiki njengoba kusondela ukhetho lukazwelonke olungonyaka ozayo, kuhloswe ngaso ukukhinyabeza iminyakazo ye-EFF.
“Kuphangwa umdaka linile yini? Siyamangalisa lesi simemezelo seANC, kwazise iphalamende lisacubungula indlela yokushintsha umthethosisekelo,” kusho uMnu Lawson Naidoo ongumqondisi omkhulu weCouncil for the Advancement of the South African Constitution.
“Iphalamende kusamele liqoqe zonke izincomo (ezenziwe ngabantu) lizicubungule. Njengamanje sezihubela sakusha ngokhetho, (kungenzeka) isimemezelo se-ANC simayelana nalo,” kusho yena.
Irandi lehlelwe ngamandla ngokushesha emuva kwesimemezelo sikaMnu Ramaphosa ngoLwesibili, lilahlekelwe wu-16 cents kubhasikidi wezimakethe ezinkulu.
Irandi lilale liwuR13.10 lavuka izolo ngoLwesithathu liwuR13.28.