USOLWA NGOKUZIGULISA
UKHUNGATHEKILE owesifazane ogulayo waseMafakatini, eMgungundlovu oxoshwe kwaSouth African Social Security Agency (Sassa) ngoba kuthiwa uyazenzisa.
UNkz Hawukile Ntshele uthi uneminyaka emithathu ezama ukubhalisa imali yempesheni yokugula ngomyalelo kadokotela, kwaSassa bamtshele ukuthi uyazenzisa.
Uthi okumphatha kabi wukuthi usehambe nezincwadi ezintathu eziqhamuka kodokotela abehlukene ezinezincomo zokuba abhalisele imali yempesheni yokugula, kodwa lutho.
Esigamekweni sakamuva, uthi uphenduke inhlekisa ngesikhathi eye kula mahhovisi, izisebenzi zavele zakhombisana ngaye.
Uthi side isikhathi egula engakwazi nokuhamba kahle, udla nemishanguzo yokugula athe kungamahlalakhona. Uthi uthwala kanzima ngoba ubuye aphelelwe wukudla futhi engekho osebenzayo ekhaya.
Utshele ILANGA ukuthi ugcina ephoqeka ukuba adle imishanguzo engadlile. "Udokotela wangenzela incwadi ukuze ngibhalise impesheni yokugula, kwazise isimo sami kasisavumi ukuba ngisebenze.
"KwaSassa bangitshela ukuthi ngeke bangivumele ngithole le mali. Ngisho ngibatshengisa incwadi kadokotela, bathi kangibonakali ngigula. Nodokotela wakhona uvele wangibuka nje, washo okufanayo engazange angixilonge.
"Ngiphindele esibhedlela ngaya kudokotela, ngasizwa ngomunye naye ongihlolile, wangenzela enye incwadi ebinezincomo zokuba ngibhalisele impesheni.
"Nakhona ngibuye ngibhocobele njengoba benqabile ukungisiza. Ngiye emtholampilo ngabachazela inkinga yami, ngadluliselwa kudokotela naye ongihlolile, wangitshela ukuthi kumele ngibhalisele imali yesibonelelo.
"Kulokhu kokugcina, bavele babukisa ngami ngoba ngifice amantombazane akhombisane ngami emahhovisi akwaSassa ethi ngiyazenzisa, kangiguli,” kusho yena.
Okhulumela iSassa, uMnu Vusi Mahaye, uthi ngudokotela womnyango kuphela okwazi ukuqinisekisa ukuthi umuntu ukulungele ngempela ukuthola impesheni yokugula.
Ube esecela imininingwane kaNkz Ntshele ukuze ezobheka ukuthi kwenzekeni.