Ubulawe ngumfowabo obeshisa uninakhulu
Bebesisola ngokuthakatha
SISINDE NGENKOSI isalukazi sakwaMbatha, eMakhowe, eMtubatuba sishiswa ngabazukulu baso ngethayi okuthiwa bebesisola ngokuthakatha, kwagcina kuphume isidumbu somunye wabazukulu.
Udaba lokungqoklozwa ngesibhamu kukaMnu Sakhile Mbatha (28) ngoMsombuluko, ebulawa ngumfowabo, kushiye amalungu omphakathi ebambe ongezansi, umndeni nawo usangene amakhanda.
Ngokuthola kweLANGA ngelungu lomndeni elizibonele lesi sigameko senzeka, uSakhile nabanye abafowabo abane (amagama abo esiwagodlile njengoba bekhalelwe ngamasongo kaSigonyela), babambe uNkk Busisiswe Mbatha (65) - ogane omunye woyisemkhulu - bamgaxa ithayi elivuthayo emqaleni bethi bayamshisa ngoba besola ukuthi uyaloya.
Bamshise ngesikhathi esemzini kamnakwabo, kukhona abeyombheka khona. Leli lungu lithi kakuphelanga isikhathi esingakanani engenile kwamnakwabo, uNkk Mbatha, bamuzwa esekhala ubumayemaye ecela usizo.
“Indlela abekhala ngayo ubuzwa ukuthi mkhulu umkhuba ugilwa kuyena njengoba ubethi, ngilekeleleni ngaze ngafa.
"Umuzi kamnakwabo nowakhe isondelene, akekho umakhelwane obahlukanisile. Abazukulu abahlala nogogo bamuzwe ekhala besendlini (kubo) baphuma begijima beyobheka ukuthi ngabe udliwa yini kwamnakwabo, kanti uSakhile usebabone kuqala wadonsa ummese waphuma engqasha efuna ukubagwaza," kusho leli lungu lomndeni.
Elandisa ILANGA umfowabo kamsolwa omncane, uMnu Thobani Mbatha (19), uthi indlela abenolaka ngayo umfowabo (esho umufi) bekucaca ukuthi uyimpi futhi bekungathi uzidlele namanzi amponjwana.
"Yize indaba ngingayazi ukuthi iqale kuphi njengoba bengifika ngiphuma ukuyobheka izinkomo, kodwa kuliqiniso ukuthi bebezama ukumshisa ugogo. Nami ngilandele umfowethu engimbone ephuma ekhaya egijima ezwa ugogo ekhala.
"USakhile udlule ngakimina, wathi sengibize umfowethu ukuba ayobasabisa ngesibhamu, esho nokuthi yena akanandaba naso. Uma simbuza ukuthi kwe- nzenjani, bamenzani ugogo, akazange aphendule, uqonde ngqo kubhuti ephethe ummese. Ubhuti ukhiphe isibhamu wadubula kabili emoyeni ezama ukubethusa.
"Uqhubekile (uSakhile) weza, wagcina esedubulekile,” kusho uThobani. Uthi udubulekile waphuthunyiswa esibhedlela saKwaHlabisa kanti uzoshonela khona ngakusasa ekuseni.
"Kakulona iqiniso ukuthi ugogo bebemsola ngokuloya, abafowethu banakho ukuthi uma bephuzile benze izinto ezingalungile. Ngelinye ilanga baklabha ubaba ngocelemba, manje ugogo ubehlale njalo uma ebabona bedakiwe abathethise aze avuse naleya ndaba yokuklabha ubaba.
"Ngisola ukuthi baze bazame ukumshisa nje, yingoba ubebakhumbuza isenzo esibi abagcine besenze kubaba ngenxa yotshwala,” kusho yena. Uthi uninakhulu uphuthunyiswe esibhedlela emuva kwalesi sigameko, kodwa wadedelwa ngakusasa ngoba ubengashile kakhulu.
“Selokhu senzekile lesi sigameko, ugogo wethukile, ubengalindele ukuthi izingane zakhe (esho abazukulu) zingaze zenze isihluku esingaka kuyena,” kusho uThobani.
Okhulumela amaphoyisa KwaZulu-Natal, uLt Colonel Thulani Zwane, uthe umufi udubuleke emqaleni nasesifubeni, umsolwa uzinikele emaphoyiseni naso isibhamu wabhala isitatimende washiya isibhamu nezinhlamvu.
"Kuthe amaphoyisa eseya endaweni yesigameko, abopha umsolwa oneminyaka ewu-21 noneminyaka ewu29, omunye obehamba nomufi kawamtholanga, ugcwele amathafa kuyimanje," kusho uCol Zwane.
Uthe amaphoyisa aphenya icala lokuzama ukubulala, abasolwa bazovela namhlanje ngoLwesine eNkantolo yeMantshi eHluhluwe. Umsolwa ecaleni lokufa kukaSakhile, umfowabo akaboshiwe.
Ugogo ubebakhuza bake baklabha ubaba ngakho ukuphuza.