I-SUNDOWNS IBONGA I-CAF NGE-BARCELONA
UHLUKANE nesizumbulu semali uPatrice Motsepe onguMengameli weMamelodi Sundowns ngokuletha iBarcelona yaseSpain ukuzodlala nezakhe.
IBarca eyizingqwele zeSpanish La Liga, izobhekana neSundowns kowokuhlonipha obenguMengameli wakuleli uNelson Mandela, emdlalweni ozokuba mhla ka-16 kwephezulu eFNB Stadium, eSoweto.
UMotsepe ubonge iCaf ngokuvuma ukuhlehlisa umdlalo weChampions League obekumele ezakhe ziwugijime neHoroya mhla ka-15 kwephezulu eGuinea. Lo mdlalo usuzokuba mhla ka-22 kwephezulu kuleliya lizwe.
IBarca kayiqali ukuzodlala neDowns njengoba kuzokube kungokwesibili kwazise la makilabhu adlalile ngo-2007. Kunqobe iBarca ngo-2-1.
Leli phephandaba lithole ukuthi uMotsepe uhlukane nemali engaphezulu kuka-R1 billion ngokuletha iBarca kuleli.
Kuthiwa isizathu sokumba eqolo kokuza kweBarca kuleli wukuthi kwinkontileka abayisayinile uMotsepe ukubeke kwacaca ukuthi ufuna iBarca ize noLionel Messi ( osesithombeni), uLuiz Suarez, u-Andres Iniesta nabanye abadlali bayo abamqoka. Kuthiwa ukhokhele nokuthi abadlali bayo abamqoka basidlale sonke isiwombe sokuqala.
“UMotsepe ubezimisele ngokukhipha imali engaphezulu kwalena kwazise ubefuna iBarcelona igijime imidlalo emibili kuleli.
"Ubefuna idlale neSundowns neOrlando Pirates kodwa iBarca yenqaba ngenxa yokuthi abadlali bayo bazokube bephuthuma ukuyomela amazwe abo emqhudelwaneni weNdebe yoMhlaba oseRussia,” kusho lo mthombo. Leli phephandaba libuza uThulani “TT” Thuswa wezokuxhumana kwiDowns, uthe akanaso isiqiniseko sokuthi kubize malini ukuletha iBarca kuleli.
UMotsepe ekhuluma ohlelweni lwezemidlalo lweMetro FM, olushayelwa nguThomas Mlambo, ukuqinisekisile ukuthi akubanga yimali encane ukuletha iBarca kuleli.
Nokho uthe akanendaba nemali into emqoka kuyena wukubona abantu abahlwempu bebona bukhoma izihlabani zeBarca yingakho amathikithi engeke abize.
Kuthiwa amathikithi azokube ebiza kusukela ku-R40.