Sishubile isimo inkosi ithatha ilambu
Llisuse enkundleni yalifaka esigodlweni sayo
SISHUBILE isimo ebukhosini bakwaMngomezulu eNkungwini, eNgwavuma, ngenxa yombhikisho womphakathi okhala ngokususwa kwelambu lasenkundleni yezemidlalo, layofakwa esigodlweni seNkosi Mphumelelo Lubelo II Mngomezulu.
Lo mbhikisho wamalungu omphakathi waseNgonyameni, eNgwavuma - obungena osukwini lwesithathu izolo ngeSonto njengoba uqale ngoLwesihlanu - uphoqe ukuba kuvalwe izikole abantu bangakwazi ukuyothola usizo lwezempilo emtholampilo wendawo.
Le nkundla ekuDedefane, khona eNgwavuma, yakhiwe wuMasipala waseJozini wafaka leli lambu ukuze kube lula ukuba kudlalwe ebusuku, likhanyisele imizi eseduze.
Kusolwa inkosi nekhansela lewadi elibuye libe ngundunankulu wesizwe sakwaMngomezulu, uMnu Ernest Vilane, ngokubukela phansi umphakathi waseNgonyameni.
Kubikwa ukuthi kakubanga nazingxoxo ngaphambi kokuba leli lambu lisuswe enkundleni. Ethintwa uMnu Vilane, uvele wathi akukho azokuphawula ngalolu daba.
INkosi Mngomezulu ithe udaba lokususwa kwelambu enkundleni liyofakwa esigodlweni sayo lwadingidwa esibayeni (ephalamende lesizwe sakwaMngomezulu).
“Okwamanje kangikafisi ukuphawula ngalolu daba kodwa ngihlele ukuyohlangana nesizwe ngoLwesithathu. Sesingazixoxela nje ngezinye izindaba kodwa maqondana nalolu, ngeke ngisho lutho,” kusho iNkosi Mngomezulu.
Imeya yaseJozini, uMnu Delani Mabika, ithe kayikho imibiko eyitholile ngombhikisho wamalungu omphakathi ngaphandle kokuzwa ngabantu nje. Iveze ukuthi inalo ulwazi ngokushintshwa kombhoshongo onelambu kodwa kunemibuzo eyibuzile kulaba baholi (inkosi nekhansela) ngokushintshwa kwawo.
“Ikhansela, ubaba uVilane kalikaze lingithinte ngodaba lombhikisho.
“Maqondana nokushintshwa kwaleli lambu, ngabuza kulo ikhansela ukuthi ngeke yini kusuke umsindo emalungwini omphakathi. Impendulo kayibanga khona njengoba sekubhikishwa nje. Inkosi yangibikela nakhona ngabuza kodwa-ke kangiyilindanga impendulo ngoba akukho engingakusho endaweni yesizwe sayo.
“Namanje kakulula ukuya laphaya ngoba kusengaqubuka imibuzo ethi ngibizwe ngubani ukuba ngiyokhuluma nabantu,” kusho uMabika.