UPHELILE UMBUSO KWIZIMEYA?
KUPHELILE ngezimeya ezilandelwa yinqwaba yabaqaphi nezihamba ngezimoto zezigidi njengoba uNgqongqoshe wezokuBusa ngokuBambisana nezoMdabu, uNkk Nomusa Dube-Ncube ememezele ukuvalwa kwalokhu komasipala ukunciphisa izindleko.
UNkk Dube-Ncube ( osesithombeni), uthi kusukela manje kayisekho imeya ezogibela imoto engaphezulu kukaR700 000, igadwe ngabaqaphi abangaphezu kwababili njengoba lokhu kumosha imali ebingathuthukisa imiphakathi. Usho lokhu ethula isabelomali somnyango wakhe sika-R1.679 billion sika-2018/2019.
“Omasipala mabanciphise ukusetshenziswa kwama- consultant, kunciphe imicimbi okuzodliwa kuyona, omakhalekhukhwini, wukupepenyeka kundizwe ngamabhanoyi abizayo kuyiwe nasemicimbini engabazuzisi ngalutho omasipala. Kasikho isikhulu noma isisebenzi esizondiza ngebhanoyi sihlale egunjini elingeyona i- economy class.
"Lolu hlu engilubalile lwezinto esizama ngazo ukonga imali, luzoshicilelwa luphoqelelwe kubo bonke omasipala esifundazweni. Ekuqaleni le mithetho ibikhona. Sekushintshile, futhi kasilindele kuphikiswa nga- lesi sinqumo,” kusho uNkk Dube-Ncube. Uthi kusukela manje bakuvala thanqa ukusetshenziswa kwama- credit card komasipala.
“Sinezinhlelo esizozibeka ukuqinisekisa ukuthi bonke omasipala bayakwenza lokhu futhi osikhwiliphambana nobhoko bazothathelwa izinyathelo. Siwumnyango sethula uhlelo olusha lwe- mobile app oluzosiza ekuthunyelweni kwezidingo emphakathini.
"Kule app imiphakathi izobika ukuvuza kwamanzi, izigodi emigwaqweni nokunye okuningi. Imiphakathi ngeke igcine ngokubika, sizophinde sibheke ukuthi kuthatha isikhathi esingakanani ukuba izisebenzi zikamasipala zilungise izinkinga ezisuke zibikiwe," kusho uNkk Dube-Ncube.