UBESETHUBENI LOKUJIKA INHLUPHEKO YAKUBO
BEKUMELE ayoqala umsebenzi eNkandla ngoLwesithathu uMnu Thabani Mzolo ( osesithombeni), obhekene necala lokudubula abulale intombi yakhe ebiyenza unyaka wesibili kwiQuantity Surveying, eMangosuthu University of Technology (MUT), uNkz Zolile Khumalo.
ILANGA lithole ukuthi uMnu Mzolo bekumele ayoqala ukusebenza njengethwasa njengoba ebesanda kuphothula izifundo zeElectrical Engineering eMUT.
UMnu Mzolo udabuka eNtabamhlophe, eMtshezi. Ubefundiswa wumndeni kaMaShandu ozinze eThekwini ngoba ubeqhamuka emndenini oswele. Umndeni kaMaShandu uqale ukumsiza emuva kokubona imiphumela yakhe emihle kaMatikuletsheni.
UMaShandu ekhuluma neLANGA ngoLwesihlanu ekuseni, uthe: “Siphoxeke kakhulu ngoThabani. Ucele imali kumyeni wami ngokuqala kwesonto (eledlule) ukuze agibele ayoqala umsebenzi njengethwasa kwi-Electrical Engineering eNkandla.
"Besimtshela nje ukuthi sesi- zomnika imali yokugcina yokuzibheka njengoba ebeseyoqala ukusebenza. Ulahle ithuba lokushintsha impilo emndenini wakubo. Ngimtshelile ngesikhathi ngiyombona ngoLwesithathu esitokisini ukuthi uzozibona yena kulolu taku asezifake kulona.
"Noma bekungathiwa yingane ephuma emathunjini ethu egile lo mhlola, besingeke siyeseke. Sikholelwa ekwenzeni konke ngeqiniso nangobuqotho.”
UMaShandu uzwakalise nokuphoxeka ngokuthi uMnu Mzolo kuFacebook ubeqhakambisa iqembu lepolitiki alilandelayo ekubeni bewumndeni osebenza ngomphakathi wawo wonke amazinga emikhakheni abakuyona. Uthi umuntu uzazi yena ukuthi uvotela liphi iqembu emndenini wakhe. “Okubi wukuthi konke lokhu ubekwenza efaka nomndeni wami singazi njengoba ebesebenzisa igama elingaziwa kuFacebook esingekho nakuwona,” kusho uMaShandu.