KUPHELA UBUHLOBO KU-MCCARTHY NE-PIRATES
KUZOPHELA ubuhlobo phakathi kwe-Orlando Pirates neCape Town City njengoba la makilabhu ezobhekana kwi-last 16 yeNedbank Cup ngoLwesithathu ngo-19h30 eCape Town Stadium.
Lo mdlalo ubhekwe ngabomvu njengoba abaqeqeshi bala makilabhu benezinjongo ngalo mqhudelwano.
UBenni McCarthy ocija iCity noMilutin “Micho” Sredojevic ocija iBucs abakawanqobeli lutho amakilabhu abo selokhu bethathe umsebenzi wokuwaqeqesha.
UMcCarthy unobudlelwano obuhle neBucs njengoba ebeke amakhokho egijima kuyona.
Kuthiwa namanje u-Irvin Khoza ongusihlalo weBucs usamthatha njengendodana yakhe.
UMcCarthy uthi kuzophela ubuhlobo ngoba naye uyayidinga le nkomishi.
“IPirates ngiyazi kahle ngoba ngidlalile kuyona futhi ifana nomndeni wami.
"Kunzima njengoba iza kithina kodwa vele bengazi ukuthi uzofika lo mzuzu wokuthi sibhekane emdlalweni wenkomishi.
"Akukho engizokwenza, ngiqashwe yiCity kufanele buphele ubuhlobo kulo mdlalo nginqobise ikilabhu yami.
Kuzoba ngumdlalo onzima kodwa noma kanjani sizowunqoba,” kusho uMcCarthy.
USredojevic uthi lo mdlalo bawuthatha njengeminye abayigijimile futhi akukho okwehlukile ngawo abazokwenza.
“Siyakwazi okufanele sikwenze kulo mdlalo iCity iyingozi ikakhulukazi uma idlalela ekhaya.
"Iyingozi kakhulu ezimpondweni.
Kodwa-ke sizoya kulo mdlalo sizicije kahle futhi sesinalo isu lokuyigingqa,” kusho uSredojevic ongaconsi phansi kubalandeli bePirates kulezi zinsuku.