UKUNGAFUNDISEKI KWABANSUNDU NGEMALI
Into athi imenze wagxila kakhulu emkhakheni wezemali wukuthi abantu abaningi abansundu kabafundisekile ngokuphathwa kwayo, kuhlanganisa ukubaluleka kokuyitshala ngokuthenga amasheya ezinkampanini ezahlukene. Uthi kakumele umuntu agcine ngokonga imali, ihlale ebhange ngoba isuke isebenzela omunye umuntu. “Ngikubone kubalulekile ukufundisa ngezindlela ezahlukene ezisemthethweni esingazakhela ngazo imali. Lokhu ungakwenza ngokutshala imali yakho emazweni angaphandle, ukuhweba ngamasheya nokusebenzisa imali yakho ngendlela,” kusho yena. Uthi wukunganaki okuholela ekutheni abantu abaningi bagcine sebengene bagamanxa ezikweletini. Into ayigcizelelayo kakhulu wukufundisa abantu ukuthenga izinto ngemali hhayi ngesikweletu. “Mina ngisho imoto kangithandi ukuyithenga ngesikweletu ngoba ugcina usukhokha into engapheli. Abanye abantu kabazi ukuthi ungakwazi ukuthe- nga umuzi ungawukhokheli iminyaka enga-20 kepha uwukhokhele iminyaka eli-10. Lokhu kuphinde kuvimbe ibhange ekutheni lifake inzalo okwenza ukhokhe into engapheli,” kusho yena.
Uthi ngoba uyabazi ubunzima bokucwila ezikweletini, ukhethe ukuba afundele ukuvumeleka ukweluleka abantu ngezindlela ezahlukene abangaphuma ngazo ezikweletini.
“Ngiyakwazi ukungakwazi kwenza lutho ngoba ukweleta wonke umuntu. Ngaphansi kwale nkampani, i-ImpiDebt, siyaluleka ukuthi uma usucwilile, yiziphi izinto ongazenza ungaze ufakwe ohlwini lwabantu abakhokha kabi noma ungaze udlelwe impahla yakho.
“Siyakwazi ukukukhulumela nezitolo zehlise imali oyikhokhayo futhi siyakwazi ukukubhalela incwadi eya enkantolo ebika ngokucwila kwakho ezikweletini uma kuwukuthi kawusasali namali yokuphila ngenxa yesikweletu.
“Ziningi izindlela abantu abangasizakala ngazo kodwa abaningi bayesaba ukukhuluma ngoba bebona ukuthi kuyihlazo ukucwila ezikweletini okuyinto engekho,” kusho yena.
UMtshali akagcini-ke ngokuba ngusomabhizinisi kepha uphinde abe ngumbhali wezincwadi njengoba ngowezi-2013 ekhiphe eyokuqala ethi: “The Power that Can Change the Cause of Your Destiny”. Ngemuva kwale ncwadi usebhale ezinye ezintathu, i-“Get Out of Debt and Start Making Money”, i-“The Thinking Process of the Rich” nethi “Biblical Laws of Financial Prosperity”.
Uthi ubhala enye incwadi azoyikhipha ungakapheli lo nyaka. Izincwadi zakhe zonke ziyatholakala ezitolo ezidayisa izincwadi.
UMnu Mtshali ushadelwe nguNkk Sphiwe Mtshali abasebenza ngokubambisaba naye kwamanye amabhizinisi akhe.
Uthi isifiso sakhe esikhulu wukuba ezemali zibe yisifundo ezikoleni, ikakhulukazi kwezabamnyama ukuze izingane zikufunde zisesesikoleni ukubaluleka kokukwazi ukuphatha imali.
“Ezinye izingane ezifunda ezikoleni zabebala ziphuma sezikwazi nokuhweba. Ngiyafisa ukuthi uhulumeni wethu enze ezemali zibe yisifundo ngoba wukungafu-ndiseki ngemali okwenza abantu abaningi uma beqala ukusebenza bazibone sebenama- credit card, amakhadi okuthenga ngesikweletu nokunye okuningi okubabuyisela emuva. Abanye bagcina bengasakwazi nokonga imali nge- ndlela, sebesebenzela isisu,” kusho yena.
Uthi okunye okubuyisela indlu emnyama emuva wukuthanda ubukhazikhazi ukuze kubone abantu ukuthi sebephumelele.
“Kasikho isidingo sokujaha impilo ewubukhazikhazi ukuze kubonakale ukuthi sewuphumelele. Kumele sikwazi ukujabulela inkululeko efika nokuba nemali ngokuba sikwazi ukulekelelana singabantu abamnyama. Sisize nabahlwempu. Yilapho kumele sibone khona-ke ukuthi uphumelele kangakanani ngokunikela kwabahlwempu kuqala,” usho kanje.
Le nsizwa inamahhovisi eThekwini naseGoli kanti ithi kumanje isezingxoxweni nomnyango wezemali njengoba inezinhlelo zokuvula ibhange labantu abamnyama. Ukwenza lokhu uthi kudingeka amalungu ali-100 athi usenawo.
Ngaphansi kwenkampani iBlaqProp, uthi usasebenza ngaphansi kwenye yezinkampani ezaziwayo, ezidayisa izindlu iminyaka emibili ukuthola isipiliyoni kodwa nakuwona lo mkhakha usengenile.
“Zikhona izindlu esesike sazidayisa ezindaweni eziseThekwini namaphethelo noma-ke ngingeke ngiqale ngizimele njengamanje njengoba ngisengaphansi kwayo le nkampani. Isikhona nendawo engiyithenge eGoli ngakha kuyo imiqasho. Ngifisa nokwenza okufanayo ezindaweni ezahlukene,” kuphetha uMnu Mtshali.