UZOQONDISWA IZIGWEGWE UMFUNDI OSHAYE UTHISHA
UZODLULISELWA ekomidini eliqondisa izigwegwe, athole isijeziso esimfanele umfundi owethuse abaningi eshaya uthisha phambi kwabanye abafundi ekilasini.
UMnyango wezeMfundo eGauteng, uzwakalise ukushaqeka ngevideo esabalale ezinkundleni zokuxhumana ekhombisa umfundi wesifazane efumba uthisha nge- exercise ekilasini.
UMnyango uthi uzomthathela izinyathelo lo mfundi ukuze ezokuba yisibonelo nakwabanye.
Lokhu kwenzeke ngoLwesihlanu esikoleni iThree River Secondary, endaweni yaseSedibeng khona eGauteng.
Lo mfu-ndi ubonakala esukuma ekilasini ediniwe eya phambili eduze kukathisha ephethe okubukeka njenge- exercise okuthe uma efika phambili wabe eseshaya uthisha ngakho kwaqhuma uhleko kwabanye abafundi.
Lo thisha naye wesifazane, ubonakala ephuma ekilasini ekhuluma nomakhalekhukhwini wakhe emuva kwalesi sigameko. Okhulumela uMnyango wezeMfundo eGauteng, uMnu Steve Mabona, uthi lesi sigameko sibethuse kakhulu bewumnyango, kwabe sekwenziwa uphenyo oluphuthumayo olungakaphothulwa.
Uthi nakuba singaziwa isizathu esiholele ekubeni umfundi ashaye uthisha, kodwa sebejube izikhulu zabo ukuba zenze ucwaningo olunzulu mayelana nalesi sigameko. Uthi abezenhlalakahle sebeqalile ukweluleka uthisha.
“Kuthathwe isinqumo sokuba kwelulekwe uthisha ngokukhethekile ukuze angaphazamiseki emsebenzini wakhe kanjalo nabafundi,” kusho uMnu Mabona. Uthi namhlanje ngoMsombuluko ithimba lomnyango wezemfundo lizovakashela lesi sikole. Ngakolunye uhlangothi, uNgqongqoshe wezeMfundo eGauteng, uMnu Panyaza Lesufi, unxuse abafundi ukuba bahloniphe umthetho wokuziphatha emagcekeni esikole.
Uthi nabazali bayakhuthazwa ukuba balekelele ekutheni izingane zifundiseke ngokuziphatha kahle esikoleni.
“Akekho umfundi ozokwenza noma yikanjani kuthuleke nje. Lo mfundi uzoqondiswa izigwegwe ngoba isenzo sakhe asemukelekile neze,” kusho uMnu Lesufi.