UMDLALO OZOFUNDISA NGEMPILO EPHILWA NGABADLALI BEBHOLA
UZOBONAKALA emdlalweni kamabonakude okhuluma ngabadlali bebhola likanobhutshuzwayo unontandakubukwa waseThekwini, uNkululeko "Tha" Simelane.
ILANGA LeTheku lihabule ukuthi amalungiselelo aseqalile alo mdlalo omusha njengoba uzoqala ukuqoshwa maduze.
Ngokusho kukaBrian Khawula ongumqondisi walo mdlalo, kuningi abantu abazokufunda ngempilo ephezulu yabadlali bebhola.
“Kuyiqiniso elingeke liphikwe ukuthi abadlali bebhola likanobhutshuzwayo baphila impilo yosaziwayo kulezi zinsuku njengoba behola itshe le mali.
"Kuningi abahlangabezana nakho empilweni yabo yangasese, ngakho-ke lo mdlalo uzobe ukhuluma ngempilo yabo ngaphandle kwasenkundleni,” kusho uBrian oseke wasebenza emidlalweni eyahlukene kumabonakude, okubalwa iNkaba ebikhonjiswa kuMzansi Magic.
Uthi lo mdlalo ngeke ugxile kumdlali othile odumile, kodwa kuzoba khona ukufana kwezi- gameko esezike zafundwa emaphephandabeni ngabadlali bebhola likanobhutshuzwayo. Echaza ngokuqoshwa kwawo eThekwini, uveze ukuthi iTheku lihle futhi nempilo yakhona abantu bazokwazi ukuyamukela kumabonakude.
“Iningi labadlali liqhamuka emalokishini. Uma sebenemali bayaphuma bayozihlalela emizini kanokusho esezingeni,” esho.
Udalule ukuthi uzosebenzisana nabalingisi abasafufusa ngoba inhloso wukuthuthukisa ikhono, kodwa ukuqinisekisile ukuthi uTha Simelane uzoba ngomunye wabalingisi kulo mdlalo.
UBrian wenqabile ukudalula isiteshi sikamabonakude lo mdlalo ozokhonjiswa kusona ngenxa yokuthi izingxoxo azikaphothulwa.
Ngakolunye uhlangothi uTha uzwakale njengojabulile ebuzwa ngokuba yingxenye yalo mdlalo.
“Nakuba ngingeke ngande kakhulu kodwa kuyangijabulisa ukuba yingxenye yalo mdlalo ngoba ngizobe ngenza into engiyithandayo,” eshaya ngamafuphi.
Abadlali bebhola kuningi abahlangabezana nakho empilweni yangasese.