UTHI AKANANDABA NOKUTHUKWA UTIRA
UTHI akazigqizi qakala izinhlamba ezibhekiswe kuyena uMthokozisi Khathi odume ngoDJ Tira, ezimayelana nodaba olube sematheni ngeledlule lweBig NUZ.
Lokhu ukusho ngemuva kwenkulumo ekhethekile kaMampintsha abe nayo neLANGA
LangeSonto, elinguzakwabo waleli phephandaba lapho uMampintsha embize khona ngembungulu. Kulolo daba ILANGA
LangeSonto lehluleke lancama ukuthola uDJ Tira ukuba aphawule, kodwa kuthe esephawula ngoLwesibili wathi akudikizi nqulu kuyena ngayo yonke into engeyinhle eshiwo ngaye.
Uthi yonke into eqhubekayo nezinkulumo ezishiwoyo mayelana nodaba lweBig NUZ ubona kuwumdlalo nje.
Uthi usamile kwisitatimende sakhe sangesonto eledlule esisuse ukukhuluma. Kulesi sitatimende uTira uthe akanankinga namalungu eBig NUZ, wathi kodwa leli qembu selinabaphathi abasha, kalikho ngaphansi kwesitebele sakhe i-Afrotainment.
“Enginesiqiniseko sakho wukuthi bayazi bona ukuthi le nto engayibhala iyiqiniso ngoba sebeqashwa kwenye indawo hhayi e-Afro, ngakho-ke angijiki esitatimendeni sami,” kusho uTira.
Uqhube ngokuthi namanje ubalindile, uma befuna kusetshenzwe kuzosetshenzwa.
Ebuzwa ukuthi uthini ngamagama ashiwo nguMampintsha ngaye, uthe ngeke akwazi ukuphendulana naye, ukholwa wukuthi umbono womuntu kumele awuhloniphe.
“Uma engibiza ngamagama ngeke ngimphikise ngoba kusho ukuthi yindlela abona ngayo naye, ngeke ngimlandele mina,” kuchaza uDJ Tira.
Lolu daba selokhu luqalile liwundabizekwayo ezinkundleni zokuxhumana njengoba abalandeli bakaTira nabeBig NUZ bezwakalisa imizwa yabo eyehlukene.
UTira ufake udaba olushicilelwe yiLANGA LangeSonto ekhasini lakhe enkundleni yokuxhumana iFacebook - kukhona abavele bamthelekela bamusho ngamaganyana, abanye bakhombise ukuzwelana naye - kuhambe isikhathi walususa.