ZIMKHALELE ODUBULE ABEBEMNCISHA UBHIYA

ULAHLWE ngelakubo umsolwa ovukwe yiqunga wazama ukudubula abesilisa ababili abamncishe ubhiya wabo njengoba ekhalelwe ngamasongo kaSigonyela izolo ngoLwesithathu ekuseni kuWarwick Avenue, eThekwini.

ILANGA lithole ukuthi umsolwa esiligodlile igama lakhe (25) aze avele enkantolo, unikele kuWarwick Avenue izolo wafica kunabesilisa ababili bedlala i- pool table behlisa ngobhiya.

Kuthiwa umsolwa uhilizisane nabo efuna ubhiya wabo ngenkani. Kuthiwa unele wabona ukuthi kabafuni ukumphuzisa, wadonsa isibhamu sakhe okuthiwa kasikho emthethweni, wadubula kathathu kodwa kwangalimala muntu.

Kuthiwa abantu abebekhona ngesikhathi eqhumisa isibhamu, bathukuthele bagana unwabu bambamba bamtalabha.

Emuva kokuba sebemnenebulile, bafonele amaphoyisa okuthe uma efika, athola ukuthi umsolwa kunecala lokubulala elenzeke ngoMgqibelo abefunelwa lona.

Kuthiwa ngoMgqibelo umsolwa ubehleli noMnu Khulekani Sigwebela (34), beshaya iziphuzo ezibandayo kwabe sekusuka ingxabano phakathi kwabo, kubangwa utshwala.

Umsolwa kubikwa ukuthi udonse sona lesi sibhamu abanjwe naso wadubula ephindelela kuMnu Sigwebela, emuva kwalokho washaya wachitha.

Okhulumela amaphoyisa KwaZulu-Natal, uCapt Nqobile Gwala, usiqinisekisile lesi sigameko wathi umsolwa kulindelele ukuba avele eNkantolo yeMantshi yaseThekwini ngamacala amathathu avulelwe wona, okungelokubulala, elokuzama ukubulala nelokutholakala nesibhamu esingekho emthethweni.

Uthi umsolwa uzovela maduze enkantolo, okwamanje usesesibhedlela.