UKHATHAZEKILE UMQEQESHI OLINYALELWE NGABADLALI
IYAXHUGA iRichards Bay FC ngaphambi komdlalo omqoka noMthatha Bucks ngaphansi kweNational First Division (NFD) ozokuba ngoMgqibelo ngo-15h00 eMhlathuze Sports Complex, eRichards Bay.
URoger Sikhakhane ocija iBay, utshele ILANGA izolo ngoLwesithathu ekuseni ukuthi nakuba limsizile ikhefu lamasonto amabili leFederation of International Football Association (Fifa) kodwa uzokuya kulo mdlalo ngaphandle kukaNjabulo Ngcobo noMati Mekoa abangakalulami ngokugcwele.
“Okungikhathazayo ngalo mdlalo wukuthi sizokuya kuwona ngaphandle kwabadlali ababili abangakalulami uNjabulo noMati. OkukaMati kubi kakhulu njengoba engase ahlale amasonto ayisi-5 kuya phezulu esalulama,” kusho lo mqeqeshi okulindeleke lukhulu kuyena njengoba enomlando omuhle wokunyusela esigabeni esikhulu amakilabhu ahlukene.
Nokho uthi uyabathemba abadlali bakhe ukuthi bazokwazi ukuyibamba ishisa kulesi sigaba abasiqale ngenothi eliphansi. Unxusa abalandeli bale kilabhu ukufika ngobuningi kulo mdlalo ukuzokhuthaza abadlali ukuthola umphumela omuhle.
Kuzo ezeNFD, iRoyal Eagles izokhiphana ukwazi neStellenbosch FC ecijwa nguSteve Barker emdlalweni ozokuba ngoMgqibelo ngo-15h00 eHarry Gwala Stadium, eMgungundlovu. I-Eagles izimisele ngokuwola amaphuzu amathathu kulo mdlalo ukujabulisa abalandeli bale kilabhu abaphume benxapha idliwa yiHighlands Park ngo-2-1 ekhaya muva nje.
Isiyonke imidlalo yeNFD engempelasonto imi kanje:NGOMGQIBELO EHarry Gwala Stadium: Stellenbosch FC 15h00.
ETuks Stadium: Pretoria University FC vs Highlands Park 15h00.
EMhlathuze Sports Complex: Richards Bay FC vs Mthatha Bucks 15h00.
ENNK Rugby Stadium: Ubuntu Cape Town FC vs Super Eagles 15h00.
EThohoyandou Stadium: Tshakhuma Tsha Madzivhandila FC vs Jomo Cosmos 15h00.
Kanyamazane Stadium: Mbombela United vs Real Kings United 15h00.
EPuma Rugby Stadium: Witbank Spurs vs Cape Town All Stars 15h00. NGESONTO EPrincess Magogo Stadium: FC vs Black Leopards 15h00. Royal Eagles vs UThongathi