Kusizwa izinhlangano ezingenzi nzuzo ukuba zenze kangcono umsebenzi wazo
KULONYAKA
wezimali ka 2017/18 uMnyango wezokuThuthukiswa koMphakathi uzohlola izakhiwo okuhlalwa kuzo abahlomula ezinhlelweni zawo kanye nezinhlangano ezingenzi nzuzo.
UNgqongqoshe waloMnyango, uNkosikazi Weziwe Thusi, utshele isiShayamthetho muva nje ukuthi uHulumeni uzobheka ukuthi lezakhoiwo ziyahambisana yini nemigomo ebekiwe yokusebenza, ukusebenzela ezindaweni eziphephile kanye neminye imithetho elawula loku.
Uthe: “Izinhlangano ezingenzi nzuzo zingabalingani bethu ekuletheni usizo kubantu futhi yizo ezisondele kakhulu kubantu. Yingakho kubalulekile ukuthi sikuqinisekise ukuthi ziyakwazi ukwenza umsebenzi ngendlela futhi zisebenzele abantu ngokuphelele.
“Zingu 2 131 izinhlangano ezingenzi nzuzo ezihlomulile ngokuthi zithole uqeqesho onyakeni wesabelomali odlule. Ngokubambisana nesakhiwo saloMnyango i-National Development Agency, sizozeluleka siphinde sizifukamele lezi zinhlangano.
“AmaForamu ezinhlangano ezingenzi nzuzo akhona fiuthi ayasebenza ngokwamazinga ezindawo, isiFunda kanye nesiFundazwe. IProvincial Executive Council iwuphasisile umqondo wokuhlaziya izidingo ezinikezelwa uMnyango kubantu (Rationalisaion of Services) ngokusebenzisa zona izinhlangano ezingenzi nzuzo.
“Lokhu kube sekunika uMnyango igunya lokuthi ukwazi ukuhlaziya ukusabalala kwezinhlangano ezingenzi nzuzo ngokwezindawo ekunikezeleni usizo, futhi kuphindwe kubhekwe nengcindezelo yokungabikhona kwezinsiza kusebenza nokuyiswa kosizo emphakthini.
“UMnyango uzokwenza ingqungquthela yesifundazwe ebizwa nge NPO Good Governance Summit ngenhloso yokwakha isisekelo sokunikezela ngoqeqesho ezinhlanganweni ezingenzi nzuzo nokuzosisa ngokwakha izinga elamukelekile lokusebenza,” kuchaza uNgqongqoshe uThusi.