Safa imifudumezo yezinhlelo zaseMelika
KUKANINGI ngihlaba ukukopelwa kwezinhlelo zaphesheya kwezilwandle bese sizenze kube ngathi ngezethu.
Ngilwa kakhulu nokuvilapha kwababhali nabaphathi bezinhlelo zikamabonakude. Ukuhlala njalo sikopela izinhlelo zaphesheya kwezilwandle kusho ukuvilapha kubabhali nabakhiqizi bezinhlelo, kanjalo nokwehluleka ukucabanga ngokujulile.
Uthisha owayengifundisa ezobuntatheli wayevamise ukuba athi buyisela umqondo wakho eduze komcabango wakho bese ususa ibhokisi eliphambili kwakho ngoba lelo bhokisi linamakhona amane azokwenza ukuba uzungeze wona uze uzungezelwe ngumqondo ungakwazanga ukucabanga, ngakho vele ulisuse nje ibhokisi emicabangweni yakho ukuze ubone okujulule ongaphandle kwaleli bhokisi.
Ngalokhu ngizama ukusho ukuthi kuzohamba kuhambe sigcine sesikhohliwe yisiteshi esibizwa ngeSABC ngoba kabezwa. Phela ngesiZulu kuthiwa isala kutshelwa sibona ngomopho.
Ngibuyele kule yokukopela izinto, mina njengomuntu ohlala egqolozele umabonakude kuyangidabukisa okwenzeka eziteshini ezikhokhelwayo zakwaDStv uma uqhathanisa noSABC.
Mhlawumbe lokhu kungangifaka enkingeni njengoba ngivula abantu inkungu emehlweni. Kodwa-ke angesabi lutho, ngeke phela si- thule sibukele abantu benziwa olibala bebe beqhubeka bekhokhela ama layisense kamabonakude.
Kunohlelo lwaphesheya kwezilwandle olubizwa ngeThe Talk Show olukhonjiswa kuCBS eyingxenye yeDstv.
Lolu hlelo lugxile kakhulu ezintweni ezisematheni ezindabeni kulelo sonto ikakhulukazi ezithinta osaziwayo kwezobumnandi.
Lolu hlelo lushayelwa nguJulie Chen, Aisha Tyler, Sharon Osbourne, Sara Gilbert noSheryl Underwood. Lezi ntokazi zikuthatha zikubeke ngokwenzeka kwelaseMelika, zingakhohlwa wukubheka ezempilo nezothando kosaziwayo.
Baletha estudio labo abafanele ukuzodingida isihloko abasuke bekhuluma ngaso, baphinde benze isiqiniseko sokuthi siyaphuma isaluleko ngemuva kohlelo ukuze obukele lolu hlelo ekhaya akwazi ukungena khaxa kulokho abasuke bekhuluma ngakho.
Inkinga yami wukukopela, sizame ukwenza uhlelo olufana nalolu bese siphinde siyehluleka ukufinyelela ezingeni lwalolo hlelo esisuke sikopela kulo.
Mangiqondise ukuthi yiluphi uhlelo engikhuluma ngalo kulokhu. Lapha ngikhuluma ngohlelo olukhonjiswa kuSABC 3 olubizwa ngeTrending SA kanti lwethulwa nguShaka Sisulu, uPabi Moloi, uKuli Roberts, noNina Hastie.
Yiqiniso elingephikwe ukuthi uma uhlelo lukhonjiswa kuSABC 3 wonke umuntu usuke esazi ukuthi kuqhuma olukaGeorge kuphela (ulimi) bese kuba ngabantu abathathwa njengabasezingeni eliphezulu ababuka izinhlelo zalesi siteshi, yize ngingaqondi kahle ukuthi basezingeni eliphezulu uma liqhathaniswa naliphi.
ITrending SA ibingaba ngezinye zezinhlelo ezihamba phambili uma bekufakwa umfutho kulona, luphinde lwenziwe luthi ukugxila kubantu baseNingizimu Afrika kakhulu ngaphezulu kokuba lwenziwe lufane ncamashi neThe Talk Show.
Kungakuhle ukuba izinhlelo eziningi zibuyekezwe, kuphinde kubhekwe ithalente elisha futhi elikhulayo endimeni kamabonakude.
Ngingephike nokho ukuthi umethuli walolu hlelo, uShaka Sisulu, uzobalethela izinkumbi zababukeli. Ngiyema lapho ngingaze ngihheme.