Akakholwanga ephuma ejele obeyofela khona
Ubedonsa esecala lokudlwengula
BEKUYINJABULO yodwa emndenini wakwaKhuluse eMadakeni eMzimkhulu, eningizimu, yeKwaZulu-Natal, kudedelwa ilunga lawo ebeselihlale iminyaka emibili ejele lidonsa udilikajele ngecala lokudlwengula ingane (8) yakwamakhelwane wakhe.
UMnu Zizamele Mkhulise (24) udedelwe ngoMsombuluko yiNkantolo eNkulu yaseMgungundlovu emuva kokuhlala iminyaka emibili ejele laseBhongweni eKokstad, e-Eastern Cape. Inkantolo imkhiphe phambili ngoba ubufakazi bungahlangani, yize kade limlahlile phambilini waze wagwetshwa.
Ubegwetshwe ngonyaka wezi-2015. Uboshwe kade enza umatikuletsheni wagcina engasawuqedanga. Emuva kokuba eseqalile ukudonsa isigwebo, uphonsele inselelo isinqumo seNkantolo yeMantshi yaseMzimkhulu okuyiyona emgwebile.
Ekhuluma neLANGA, ubehluleka nawukuzibamba ngendlela abejabule ngayo. Uthi akukho zinyathelo azozithathela abebemsola kodwa konke ukubeke kuNkulunkulu ukuthi uyena ozothatha isinqumo. Uthi akakholwa namanje ukuthi usekhululekile njengoba ubehlala ekhala ejele engakholwa ukuthi ugwetshelwe into angayazi.
Uthi konke lokhu kuqale ngowezi-2013 ngesikhathi esolwa ngumakhelwane wakhe ngokudlwengula.
“Ngikhumbula ukuthi bengihleli ekhaya ngesikhathi kufika omunye womakhelwane bami engitshela ukuthi ngidlwengule ingane kadadewabo. Unginike umakhalekhukhwini engitshela ukuthi udadewabo ufuna ukukhuluma nami ngalolu daba.
“Ngenxa yokubona ukuthi lolu daba lungaphezu kwamandla ami, ngimtshenile ukuthi angene endlini akhulume nabadala ngoba bengingayazi nento abengisola ngayo. Ekhaya bacele unina wengane ukuba eze ekhaya ukuze kuzoyiwa kudokotela ozohlola ingane. Unqabile ukuza kwabe sekuthuleka kanjalo.
“Akazange aye ukuyovula icala kodwa bengihlala ngizwa ngabantu ukuthi ungikhuluma kabi, uthi ngidlwengule ingane yakhe. Ngowezi2014 kuqubuke ingxabano phakathi kwakhe nobaba, kungalesi sikhathi eye khona emaphoyiseni wayongivulela icala ethi ngidlwengule indodakazi yakhe.
“Ngiboshiwe kodwa ngaphuma ngebheyili laqhubeka icala laze langigojela ngowezi-2015. Ngigwetshwe udilikajele. Ngesikhathi imantshi ikhipha isigwebo, ngiqale ngangakholwa. Ngithe sengisejele ngigqoke izingubo zakhona, kwabuya ukuthi impilo yami izophelela khona. Ngihlalile ejele ngikhala imini nobusuku ngicela kuNkulunkulu ukuba ageze igama lami ngoba bengiboshelwe into engingayazi,” kusho yena.
Uthi uze waxhumana nabameli basidlulisa lesi sigwebo ukuba sibuyekezwe.
UMnu Zwelinjani Philimon Mkhulise, onguyise kaZizamele, uthi ujabule kakhulu ngokuthi iqiniso selivelile ukuthi indodana yakhe imsulwa.
“Bese ngizitshelile ukuthi ngizoze ngife umntanami ebhadle ejele ngento angayenzanga. Bengihlala ngimtshela ukuba aqine uma ngimvakashele, ngimtshela ukuthi konke makakubeke kuNkulunkulu, nguyena ozoveza iqiniso. Kuyangithokozisa ukuthi useze wayiphendula imithandazo yethu,” kusho yena.
UMnu Derrick Mdluli, wePrisoners and Detainees Trust (JPDT) - okuyinhlangano elwela amalungelo eziboshwa - uthi kuningi obekushayisa amakhala ngaleli cala kanti bekukhona nobudedengu bomphenyi.
Uthi naye uke wadideka ngesikhathi umndeni uya kuyena uyocela usizo lokuba alekelele ukuze uZizamele aphume ejele ngoba ubengayazi into aboshelwe yona.
“Sithe uma sibheka nabameli, sabona zisuka nje ukuthi kayikho le nto agwetshelwe yona ngoba ubufakazi bebungahlangani. Siye eNkantolo eNkulu eMgungundlovu lapho egcine ephume khona lo mfana emuva kokubuyekezwa kwesigwebo,” kusho yena.
Uthi okwamanje basazoxhumana nenkampani eyaziwa ngeSneller egcine obekuqoshwa enkantolo ngesikhathi kuqulwa icala ukuze bezonikeza abameli babo.
“Uma sebelalele konke obekwenzeka kuqulwa leli cala, bazobe sebeyasinika isinyathelo okumele sisithathe,” kusho uMnu Mdluli.
skhom@