ISILOMO SOMLINGISI SIZODODISA ABAFANA EMSAKAZWENI
INKAKHA yomlingisi umuzi Mthabela, ithi uthando lokulingisa luza kuqala nakuba isingene emsakazweni njengoba isiyingxenye yesiteshi ivuma FM, lapho isakaza khona uhlelo iweekend Crush njalo ngomgqibelo ekuseni, ngokubambisana nosne Mkhize.
“Umsakazo ngeke uphazamise ukulingisa. Ukulingisa yinto engiyiyo," kusho umthabela.
Njengamanje ulingisa umenzi Vilakazi kwimbewu. “Eminyakeni eyedlule, njalo uma ngiyokwenza inhlolokhono emsakazweni bengifikelwa wuthando lwawo.
"Kuyinto evele yazenzekela, kwaqhamuka ithuba njengoba sengimningi ethekwini,” esho.
Ohlelweni uzophosa esivivaneni ngokuzama ukwakha imindeni ngokubheka izinkinga ezihlasele abesilisa nabesifazane. Uthi njengoba izwe libhekene nesihlava sodlame olubhekiswe kwabesifazane nezingane, ubona lena kuyinto okumele isukunyelwe.
“Ngikholwa wukuthi udlame lubhebhethekiswa yibona bobubili ubulili kodwa esikhathini esiningi kuba ngobaba. Kulolu hlelo sizokudingida konke lokhu.
"Kunobaba abangazange babe nabantu abangobaba kubona, abangazi ukuthi kumele babe ngobaba kanjani ezinganeni zabo.
"Sizofundisa abafana ukuthi ukhula kanjani ukuze ube yindoda eqotho,” kusho umthabela.
“Bakhona abazoguquka futhi bakhona okuzothi uma belalele, bazibone bona kwesikuxoxayo. Ukushintsha koyedwa kubalulekile kakhulu,” kusho yena.
Uthi uzobe engagxilile kwabesilisa kuphela, kepha nakubona abesifazane.
“Sizobe sibuza ukuthi bakhala ngani, bafisa kushintshe kuphi. Ngiye ngiphatheke kabi futhi bese ngiyamshiya umuntu oba nomqondo wokuthi wonke amadoda ayizinja. Kubalulekile ukuqaphela indlela abesifazane abakhala ngayo,” kuphetha yena.