Ubumnandi bamaholidi bungakushiyi nezikweletu
Baningi abagaxela ezikweletini kulesi sikhathi sonyaka
OKWENZIWA ngabantu ngesikhathi samaholidi okuphela konyaka, sekwaze kwaphetha ngokuba lesi sikhathi siteketiswe ngolwasemzini kuthiwe yi-" silly season", okusho isikhathi lapho abantu benza izinto ezingaphusile.
Ngokwedlule sike sathi halamuzi ngenkinga yokuqolwa kwabantu imali yesitokofela. Namuhla siyedlula kuleso sahluko ukuze sibheke ukuthi uma kuhambe kahle, izigebengu lezo zangaphumelela ukuba zibaqole abanye bethu, yini eyenziwayo ngaleyo mali ebikade iqongelelwa kanzima unyaka wonke.
AMAQHINGA EZITOLO
Njalo ngonyaka kuba nezinsuku kumbe usuku lwekhalenda olwaziwayo ukuthi abathengi bavula amaphakethe kakhudlwana kunangemihla ejwayelekile.
Ezinye zalezo zikhathi yilezi: wusuku lwezithandani ngonhlolanja (February), yisikhathi sephasika, wusuku lomama ngonhlaba (May), wusuku lobaba ngonhlangulana (June), yiholide labesifazane ngoncwaba (August), nesikhathi sikakhisimusi noncibijane ekupheleni konyaka.
Muva nje sekukhona nosuku olwaziwa ngeblack Friday nalapho abanikazi bezitolo besuke beza namanye amaqhinga okufinyelela kakhudlwana emaphaketheni abathengi.
KUTHINI LOKHU?
ILANGA Langesonto lixhumane nosolwazi Bonke Dumisa, ongungoti wezomnotho, ukuba asike elijikayo ngodaba lwendlela abantu abasebenzisa ngayo imali esuke ifika ezandleni zabo iwumthanyana ngesikhathi esisodwa, njengayo lena yezitokofela namabhonasi okuphela konyaka.
Uthe ukuzijabulisa akuyona into embi, kodwa abantu kungaba kuhle bajabule babuye nganeno, bangeqisi.
"Abathengi kuhle bazi umehluko phakathi kwezinto abazidingayo nabazihalelayo, impilo engaqhubeka noma zingekho," kusho yena. Kulabo abahlose ukuthenga ngokonga, uthe kusemqoka ukuba baqaphele ukuthi zona lezi zinsu- ku ezinedumela, esikhundleni sokuba amanani ehle empeleni ayenyuka.
BUNGALANDELWA WUSIZI UBUMNANDI BAMAHOLIDI
Njengoba sekushiwo ngasekuqaleni kwalolu daba ukuthi lesi sikhathi sesaze sethiwa ngelithi "silly season," kuningi esikubona kwenzeka ngalezi zinsuku onyakeni.
Kulabo abakade behlanganisa imali ukuze bathenge igilosa ngokuhlanganyela ukuze kwehle amanani ( bulk buying), kusemqoka ukuba baqaphele lokho kudla okufika kukuningi kanjalo ukuthi akungaxhaphazeki.
Phela uma abantu bakithi bethokozela lesi sikhathi, kuyenzeka kuphekwe ngokweqile esibalweni sabantu abavakashile bese lokho kudla kugcina ngokuchithwa.
Kokunye asize singabakhona nesiqiniseko maqondana nokuthi lokho kudla kusuke kungaphelelwa yisikhathi na ( expiry date).
Kulabo abangayithenganga igilosa eyeqile, uzothola ukuthi imali bayisaphaza ezindaweni zobumnandi, nokulandelwa wukuba yonke imali ekade ikhona iphele kanye namaholidi.
Ayisaphathwa-ke eyokuthi konje isuke yongiwe yini imali yokubhekana nezidingo ezihambisana nokuvulwa kwezikole. YINI ELANDELA LAPHO?
Kuyiwa komashonisa, umuntu ashone aze avele ngokhakhayi ezikweletini! Ukuba nemoto kulezi zinsuku kwabanye kuyisidingo esibadalela ingcindezi.
Phambilini lesi sikhathi sonyaka besaziwa ukuthi abantu, ikakhulukazi abesilisa, bazogaxela ezikweletini noma bachithe imali yebhonasi ngokuthenga imoto ekhwehlelayo, egcina ukuzihambela mhla ifika.
Nakuba kungasakhulunywa kakhulu ngalo mkhuba wokuthengwa kwezimoto ngemali yamabhonasi okuphela konyaka, kusemqoka ukuluqaphela ulimi olushelelayo lwabathengisi bezimoto.
Kukho konke lokhu, indaba ilele kumnikazi wemali ukuba afunde kwezakhe, azithibe.
ISIMO SOMNOTHO
Kulabo ababhekisisayo bayakwazi ukubona ukuthi empeleni lezi zinsuku kwikhalenda osekwaqoshwa ukuthi ngezemigubho ethile, kahle kahle ziyefana nje nezinye.
Okusho ukuthi ngalesi sikhathi lapho leli zwe libhekene nesimo sokwehla kwamandla omnotho, kungabasiza abantu ukuba bangenzi izinto ngokweqisa. Ukungeqiwa mcimbi sekwadlulelwa yisikhathi kulesi simo somnotho esinjena. bonginkosi@ilanganews.co.za