Gqoka ngendlela ehambisana nesakhiwo somzimba wakho
IMFIHLO yomuzwa wokuzizwa kahle unokuzethemba uma ugqokile, kayincikile ekutheni ube yisazi sezemfashini, kodwa ilele ekutheni usiqonde isimo sokwakheka komzimba wakho.
Isisho esidume kakhulu kwezemfashini sithi kakuyi ngokuthi ugqokeni, kodwa okubalulekile wukuthi ukugqoke kanjani.
ILANGA likhulume nosindi Shangase, ongumphathi wedurban Fashion Fair, okuwuphiko olwengamele ezemfashini ngaphansi kukamasipala wetheku, osicobelele ngamathiphu ambalwa uma ugqokile.
“Yizinto ezincane ezenza ukuba impahla ikuhlale thaqa, njengokwazi ukugqoka okuhambisana nendlela umzimba wakho owakheke ngayo.
"Ukugqoka kumayelana nomyalezo osuke ufuna ukuwedlulisa nangendlela ofuna ukukhunjulwa ngayo.
“Ngemfashini uyakwazi ukushiya isithombe esithile ngawe kuze kuthi noma umuntu engekho eduze kwakho, kodwa uma ebona into ethile avele ayimatanise nawe ngenxa yokuthi uyaziwa ukuthi lesi sitayela ngesakho,” kusho yena.
Uthe kubalulekile ukuba uma ugqokile ungabuki into egqokwe ngomunye umuntu bese uyayihalela ngoba kungenzeka ingahlali ngendlela efanayo kuwena.
Ngokusho kukasindi abantu kumele bakuqonde ukuthi kabakhiwe ngendlela efanayo, okusho ukuthi kumele umuntu nomuntu agqoke okuhambisana nesakhiwo somzimba wakhe.
Uma unesifuba esincane, ungasondeli kuma- t-shirt ango-vneck ngoba adonsa amehlo emabeleni.
Funda ukugqoka okuhambisana neminyaka yakho, yize lokho kungasho ukuthi sekufanele ube ngu'magogo'. Impahla owawuyigqoka uzibone futhi uzizwe ushisa ngesikhathi useneminyaka eko-20 kungenzeka ingabe isahambisana nokushintsha komzimba wakho uma usuko-30 kuya phezulu.
Uma wakhiwe wavuleka kwesingezansi, ngeke zikufanele iziketi ezinama- pleat ngoba azohlakazeka kungabe kusabukeka kahle.
Uma uthenga okwangaphansi, qiniseka ukuthi uhlale uzikala, kwazise umzimba uyashintsha ngokuhamba kwesikhathi.
Uma ugqoke u- bra, kumele amabhande ahlale ngendlela engakukhandli. Akumele amabhande kube sengathi uwatetile futhi kumele amabele ame mpo uma uwugqokile, angakusindi.
Uma ugqoke izimpahla eziyilow cut, ungalokothi ugqoke isikhindi sangaphansi esiyi- full.
Uma unamahlombe avulekile ungayigqoki into enezimpontshi ngoba uzobukeka sengathi uyandiza.
Olunye ulwazi olucashunwe kwi-daily Mail, luthi uma unemilenze emifushane kuyasiza ukugqoka ama- stiletto ukuze ulule umzimba uphinde ubukeke sengathi unemilenze emide.
ayandab@ilanganews.co.za