Ezishaqisayo ngendodana kamengameli Zuma
EZOSAZIWAYO: Kuthiwa ayipheli kuntuthwane Road
KUNEZINSOLO eziqinile zokuthi umnu Edward Zuma, oyindodana kamengameli Jacob Zuma, usethole umuntu omusha ngemuva kokubhidlika komshado wakhe ongathathanga isikhathi eside.
Imithombo ehlukene YELANGA Langesonto ipotshozele leli phephandaba ukuthi u-edward akasapheli egwaqweni untuthwane, esigcemeni kwam Kwamashu, enyakatho yetheku, lapho kuhlala khona insizwa okuthiwa usezwana nayo engumnu Mlungisi Zulu.
Ngemuva kokuba leli phephandaba lincinzwe indlebe yimithombo yalo ethembekile, libe selivakashela kuyo le ndawo, lathola ukuthi nebala yindaba exoxwayo le nakuba ikhulunyelwa emakhokheni.
Okucacile wukuthi abantu bayesaba ukukhuluma ngayo ngokuvuleleka. Omunye uze wexwayisa intatheli ngokuthi iqaphele ngoba uzoyenzakalisa lo mlisa okuthiwa uthandana no-edward.
Abanye bavele bazihlangula, bayalela intatheli ukuba ixhumane nothile, ongayinika lonke ulwazi.
Owesifazane okubikwe ukuthi usondelene nalaba ethintwa yintatheli uyitshele ukuthi konke lokhu ebukubuza kuye kungcono ikubuze kumnini wodaba, umlungisi.
Kudlule isikhashana intatheli ikhulume nalo wesifazane, yabe isithola ucingo luvela kumlungisi, wathi kuyona uzwe kuthiwa iyamdinga. Intatheli icele ukuba abuye ayishayele (ucingo) ngoba ibisesemgwaqweni ishayela kodwa wala waphetha, wathi makukhulunywe ngaleso sikhathi ngoba yena uyongena ebhanoyini.
Intatheli ibe isibuyela eceleni komgwaqo, yamchazela ngodaba elulandelayo, yabuza imibuzo.
Uvele wabhoka ngolaka wathi akafune kuphawula lutho futhi akekho umuntu wakwazuma amaziyo maqede wavala ucingo. Kudlule imizuzwana waphinde washaya ucingo futhi wabuza intatheli ngokufuthelana ukuthi ngabe ikuzwe kahle yini ayitshele khona.
Ngemuva kokuthola ucingo luvela kumlungisi intatheli iphinde yashayela lo wesifazane yamtshela ukuthi umlungisi useyifonele. Unele ukuzwa lokho lo wesifazane washaya ungqimphothwe, waphika walala ngomhlane ukuthi uke wakhuluma nentatheli.
“Hhayi ngeke, mina angiyena lo muntu obukhuluma naye futhi kwamlungisi Zulu angimazi,” kusho lo wesifazane.
Ugcine esethi yena ungowaseNanda hhayi Kwamashu. Uqhube wathi konke lokhu akukhulume nentatheli ekuqaleni ubedidanise abantu. Ucele intatheli ukuba ingaphinde imfonele, wathi imqhatha nendoda yakhe.
Nakuba umlungisi ephike wama ngentaba ukuthi uyazana noEdward kodwa ILANGA Langesonto likwazile ukuthola ubufakazi ( isithombe esingenhla) bokuthi bayazana.
Ngemuva kokutholakala kwalobu bufakazi intatheli iphinde yamnika ithuba umlungisi ukuba aziphendulele kodwa wabhoka ngolaka, wathi: “Umthetho wakho uzwa kanjani? Kunini ngikutshela ukuthi angazani nento ongibuza yona.”
Imithombo yaleli phephandaba, evamisile ukubabona laba bendawonye khona Kwamashu, ikuqinisekisile ukuthi u-edward akapheli endaweni, ikakhulukazi ngezimpelasonto. Kuthiwa ufika ephethe ogologo abaphambili, kukhishwe izihlalo kuhlalwe egcekeni kwaMlungisi kuphuzwe.
Ngesikhathi ILANGA Langesonto lixhumana no-edward naye uphike wahlanza okubomvu ukuthi uyamazi umlungisi.
“Kwamashu ngiyakwazi futhi nginekhaya khona,” kusho u-edward.
Ekhuluma nentatheli ubebuye ahleke sakubhinqa.
“Nizoboshwa uma nithuka abantu. Nichaza ukuthi mina ngiwumbobo?” ebuza ngokudinwa.
Ukugcizelele ukuthi akamazi yena umlungisi.
Ube esetshela intatheli ukuthi ucela bahlangane ngehora le-10 ekuseni ngomgqibelo (ngesonto eledlule) ukuze kutholakale kahle izimpendulo eziphelele. Kodwa akabange esaxhumana nentatheli ukuqinisekisa umhlangano njengoba ubethembisile ukuthi uzothi uma efika bese eyithinta ayitshele indawo lapho bezohlanganela khona.
Kwale noma intatheli isiphinda imshayela ucingo ngomsombuluko kodwa wangalubamba futhi wangabuyela kuyona.
Kuleli sonto imithombo yeLANGA Langesonto itshele leli phephandaba ukuthi ngawo umsombuluko umnu Zuma ubonakele futhi khona kwam Kwamashu.
Ngonyaka wezi-2011 ngomfumfu (October), u-edward ushadelwe ngunkz Phumelele Shange.
Umshado wabo ubusezingeni eliphezulu, wenzelwe esiqiwini itala, ngasecamperdown. Kuthe ngowezi-2014 kwavela imibiko yokuthi igoda lomshado ligqabukile, okusho ukuthi lo mshado udonse iminyaka emithathu nje kuphela.
Kubikwe ukuthi babe nezinkinga ezishubile, eziholele ekubeni inkosikazi ibophe imithwalo yayo ishiye phansi umendo. hlongwaj@ilanganews.co.za
Nizoboshwa uma nithuka abantu. Nisho ukuthi mina ngiwumbobo?