Gqoka uphole uma usebhishi
MANJE sekucacele noma ngubani ukuthi lethwese ihlobo. Sekuyisikhathi sokuba abantu bagqoke izimpahla ezishayisa umoya, ezinhle, ezinemibala ekhangayo.
Kungabe uya eholidini, mhlawumbe uyazikhipha uyoshaywa wumoya olwandle, noma kwiswimming pool yasekhaya, kodwa okusalayo wukuthi kumele ubukeke kahle, uhambisane nesikhathi sehlobo.
Uma sekuyilesi sikhathi baningi abafisa ukwazi ukuthi bangazigcina kanjani bebahle, bagqoke ngendlela ehambisana nehlobo nesikhathi sokunethezeka.
Umamsie Mkhwanazi ongumsiki wengqephu welebuli i-afrolucious Designs, uthi akuqaphelile wukuthi abantu abeve sebegqoka kahle muva nje uma bezikhiphile.
Lokhu kwenzeka ikakhulukazi uma abantu bevakashela ebhishi, ukuba bagqoke ngendlela efanele.
Uthi kungenzeka ukuba izinkundla zokuxhumana ezifana no-instagram zinomthelela ekuchushiseni abantu ngamasu okuthi bangazigcina kanjani bebukeka kahle futhi besesitayeleni.
Umamsie uthi kulo nyaka wezi2017 ama- maxi dress angenisile, yimibala e- floral, yi- beach pyjama style nemibala egqamile.
Uthi kwabesabayo ukuveza imizimba yabo ebhishi kunama- gown akhiwe ngendwangu ye- chiffon okwazi ukuba uzigqokele wona ngaphezulu kwe- bikini noma i- swimsuit.
“Ophaqa, i- straw hat, amasunglasses ne- sunscreen akusali ngaphandle.
"Abasuke bethatha izithombe ebhishi kumele baqaphele ukuthi kabanikezi abantu abangabazi amafoni ukuba babashuthe njengoba kungathembakele muntu,” kwexwayisa umamsie.
Uma ukhetha into ozoyigqoka ebhishi yenza lokhu okulandelayo:
Khetha ukuthi ufuna ukugqoka isitayela esinjani
Thola i- bikini oyithandayo ekwenza ukhululeke uma uyigqokile.
Khetha ukuthi ufuna ukugqoka into ezokwemboza noma cha.
Yengeza ngokokuhloba ( accessories) ukuze ubukeke kahle.
Amathiphu ngezimpahla ezihambisana nebhishi:
Khetha uhlobo lwendwa- ngu kakotini esikhundleni se- synthetic
Indwangu e- synthetic ikwenza ujuluke uma kushisa, yingakho ingafanele ukugqokwa ebhishi. Khetha imibala egqamile ukuze uxoshe ilanga.
Isigqoko
Isigqoko asilungele nje ukuvikela ilanga kuphela kodwa sikwenza ube sesitayeleni uma usigqokile.
Ungakhetha isigqoko esakhiwe ngendlela ethandwa nguwena kodwa lezi ezibizwa ngama- straw hat yizona ezihamba phambili.
I-maxi dress
Uma ufuna ukubukeka usesitayeleni ebhishi, gqoka enama- stripes amakhulu nesigqoko, nakanjani amehlo abaningi azobe ejika nawe.
I-kaftan
Yinhle kakhulu uma uzoyigqoka ne- swimsuit. Ngokujwayelekile yenziwe ngohlobo lwendwangu oluthambile futhi olukhanyayo nokuyinto enhle ezokwenza ukuba uzizwe upho- lile nomoya ukushaye kahle.
Okokuhloba (accessories)
Ungenzi ihaba uma uhloba. Uma kuyiwa ebhishi kasikho isidingo sokukhipha konke onakho. Faka nje okuncane futhi imihlobiso eyakhiwe ngensimbi iyashesha ukushisa uma kunelanga nokungadala ukuba ikushise isikhumba.
Khumbula ukuthi kasikho isidingo sokuba ugqoke i- swimsuit noma i- bikini uma ungathandi. Ungagqoka ingubo epholile, i- short ne- bikini top, i- jumpsuit noma i- maxi dress, i- denim short namasandal.