Simethulela isigqoko uskhosana
KWESINYE isikhathi kuhle ukubonga umuntu esadla amabele ukumfaka ugqozi lokuqhubeka nokuhle asuke ekwenzela isizwe. Nokho-ke kwesinye isikhathi lokhu kuba yingozi ikakhulukazi uma onconywayo ezokufaka kakhulu ekhanda ukuthi wenza kahle bese eyakhukhumala esikhundleni sokukhula ukuze adlondlobale nakakhulu.
Ngeledlule abagijimi baseningizimu Afrika benze ezibukwayo emidlalweni yomhlaba bebuya nezindondo eziyisi-6 okokuqala ngqa kwi-international Association of Athletics (IAAF) World Championships ebibanjelwe elondon, e-england.
Laba bagijimi bebeqokwe yiAthletics South Africa (ASA) ukuyomela leli lizwe elondon. I-ASA ibukeka iyibambe ngakho selokhu isikhundla sokwengamela sithathwe ngu-aleck Skhosana ngowe- zi-2014. Kuzokhumbuleka ukuthi uskhosana ungene kulesi sikhundla izinto zimapeketwane.
Ngaphambi kokuhlala kukaSkhosana kulesi sikhundla, abagijimi bakuleli bese bephila ngokungazi ukuthi bazokwazi yini ukumela izwe emidlalweni yomhlaba. Eminyakeni emithathu engenile uskhosana, izinto sezishintshe kakhulu njengoba nesikweletu sika-r20 million ebesibhekene nale nhlangano sesiphelile.
Empeleni izinkinga ZE-ASA beziqale ngowezi-2009 kuphethe uleonard Chuene ngesikhathi kuqubuka indaba yobulili bukaCaster Semenya evukuzwe wukubuya kwakhe nendondo yegolide kwiworld Championships eberlin, egermany. Lolu daba luholele ekutheni uchuene akhonjwe indlela nayo yonke ibhodi yakhe. Lokhu kwelanywe wukushiya kwabaxhasi ubuthaphuthaphu. Ngemuva kokuxoshwa kukachu- ene, isascoc ifake uray Mali ukuhola I-ASA, wehluleka. Kungene ujames Evans ebambisene nohendrick Ramaala kwanhlanga zimuka nomoya. Ngalesi sikhathi abagijimi bebengayitholi nemali yabo okuholele ekutheni bagxobe itoyitoyi befuna u-evans aphume kulesi sikhundla.
U-evans ugcine ekhishwe ngevoti kwi-asa kwangena uzola Maja- vu ochithwe YI-IAAF ephoqelele ukuba kuyiwe okhethweni oluthathwe nguskhosana maphakathi nowezi-2014.
Uskhosana ungene kungekho ukuthula kule nhlangano. Ibikweleta imali u-r20 million kanti nehhovisi layo licishe ladayiswa esidlangalaleni. Eminyakeni emithathu bungenile ubuholi bukaskhosana bukwazile ukukhokha lesi sikweletu kanti nezisebenzi sezihola ngesikhathi.
Iningizimu Afrika ibiqala ngqa ukuthola izindondo eziyisi-6 kwiWorld Championships kanti nyakenye abasubathi bakuleli bagile izimanga kuma-olympic Game, ebrazil, bebuya nezindondo ezine.
Uwayde van Niekerk ungene emlandweni ephula irekhodi lomhlaba le-400m likamichael Johnson wase-united States of America (USA) ebese lihlale iminyaka eli-17. Ubeke elika-43:03.
Emidlalweni yaselondon elakuleli lilale endaweni yesithathu emhlabeni kanti neqembu lamajuniya lenze kahle KWI-IAAF ekenya njengoba libuye likleliswe endaweni yokuqala emhlabeni. Ukwenza kahle kwe-asa ngaphansi kukaskhosana kuholele ekutheni I-IAAF ihloniphe lo mholi ngesitifiketi ngenxa yamagalelo akhe okubumba le nhlangano ebisinhlakanhlaka okwamasimba omthini.
Uskhosana kulindeleke ukuba aphume kule nhlangano ngowezi-2020 okunethemba lokuthi uzokube eseyibeke phezulu nakakhulu. Yize yenza kahle I-ASA kodwa kunabathile abaphezu komkhankaso wokungcolisa igama lakhe njengoba bethi makehle esikhundleni ngoba siyamehlula. Ngale mpumelelo YE-ASA ngaphansi kwakhe, ILANGA Langesonto limethulela isigqoko umhlanga, njengoba edume kanjalo uskhosana kwabaningi.