KUDINGEKA ITHUBA NAKUBA KUNGEKE KUBE LULA
KUMNANDI ukubona inqubekela phambili kubasakazi bethu ikakhulukazi uma kunezinhlelo esizikhonzile.
Ngomsombuluko odlule ISABC imemezele kwabezindaba ukuthi u-udo Carelse usezobamba uhlelo lwezemidlalo lwakusihlwa emetro FM nsuku zonke ngokubambisana noMpho Maboi (ozongena ngoLwesine kuphela) ovele wenza ezemidlalo kulo msakazo. Lolu hlelo lusazongena ngesikhathi esifanayo njengoba bekwenzeka lusashayelwa ngurobert Marawa (18h00-19h30), okwehlukile selunegama elisha okuyithe Ultimate Sport Show (TUSS).
Mangisho nje zisuka ukuthi u-udo kangiwangabazi nakancane amandla akhe njengoba eza nesipiliyoni seminyaka engaphezu kwamashumi amabili ekule mboni yezokusakaza. Usebenze emazingeni ahlukene okusakazwa kwezindaba zezemidlalo ezinkundleni ezahlukene, ebhala esakaza emsakazweni nakwithelevishini imbala.
Lokhu nje kukodwa kusho ukuthi mancane amaphutha angawenza, hhayi kodwa into efana nokwesaba ukubhekana ngqo nabathintekayo odabeni olushisayo noma ukuzithola esethithiza ngoba nakhu kunomdlali oyintandokazi phambi kwakhe (star struck) nokunye nje okusondelene nokuphatha uhlelo.
Imetro FM yisiteshi esikhulu kakhulu kanti lona nje lolu hlelo azongena kulo belunzima ngendlela exakile. Umarawa ufike walibeka kwelinye izinga nokuzokwenza kube nzima ukuba oluthathayo isheshe ibonakale impumelelo yakhe.
Iqiniso phela wukuthi sisazomqhathanisa naye umarawa kanti noma kungathiwa wenza umsebenzi ongcono kunaye, abebemthanda kakhulu umarawa basazomshaya ngomzimba nje. Osekuyosiza ekugcineni wukuthi umlaleli uyisimukanandwendwe, emuva kwesikhashana baningi abazobe sebeshade naye.
Ngomsombuluko wakusasa kulindeleke ukuba luqale lolu hlelo luka-udo. Ngikuthokozele ukubona ukuthi naye ezinkundleni ezahlukene uphawulile ngokunikezwa kwakhe lo mkhonto ocijwe ngumarawa nalapho ebesho khona ukuthi akangeni la ukuze acishe umlando ngoMarawa kodwa uzosebenza ngoba akekho ongenza okwenziwe ngumarawa.
Kube buhlungu kwabaningi ikakhulukazi kwabalendela ezemidlalo eshiya umarawa ngojuly. Isisusa sokuhlukana kwenhloko nesixhanti phakathi kukarob nemetro FM kube wukweseka kwakhe umdidiyeli wohlelo ubeverly Maphangwa obesolwa ngabaphathi ngokungenzi kahle. Ngeke sisaphindela emuva kodwa nakho lokho kumakhele olunye ugazi lo mlisa ngoba kukhombise ukuthi uyindoda enomgogodla oqotho njengoba ethe uyofa la kufa khona ubev ngoba bebezithathe ndawonye izinqumo kodwa abaphathi bephuma naye iqhubu, nguye phela owengamele uhlelo.
Kunezigaba zalolu hlelo namatemu ayophuma kanzima ezingqondweni zabalaleli afana nama- scorpions, room dividers, chairman’s chair nokunye obekugqamile. Baningi abebathosa ngokungahlonizi kulolu hlelo nokuzokwenza abhekwe ngawokhozi u-udo ngobukhali nesibindi sakhe.
Sekuwumlando ukuthi upitso Mosimane, Shakes Mashaba, Minister Fikile Mbalula nabanye abaningi ike ayangabhekana naye kwazise sibuye sehluleke wukwahlukanisa umsebenzi nesiqu somuntu. Simbhekile-ke u-udo nompho, okubalulekile wukubanika ithuba ( fair play).
Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali.
Instagram: @zowakha, Facebook: Zowakha Mbatha Twitter: @Zowakha zowakha@ilanganews.co.za