Kumqoka ukuba siwazi umhlaba wethu
UMA selula amehlo ethu siwabhekisa kokuningi okwenzeka emhlabeni uthixo asibeka kuwona, kuningi okuyaye kusishiye nemibuzo, eminye yayo egcina ingaphendulekile.
Umhlaba lo oyisenabelo sezinyawo zikankulunkulu uyithafa lapho thina bantu sibekwe khona ukuze sihlale kuwo, sizakhe sibumbane, sibe ngabantu abakuthakaselayo ukuba ngababusi kuwo.
Leli thafa eliwumhlaba lilungiswe ngokukhethekile ukuba thina bantu sikwazi ukuzakhela noma yini engaba yinhle emehlweni ethu, nengamthokozisa uthixo. Umhlaba uyisipho esivelele esasiphiwa njengoba siyindalo ekhethekile kankulunkulu.
Ukuwubuka nje umhlaba kukuphonsela inselelo yokuba uzibuze, ubuze nabaseduze kwakho ukuthi bawazi kangakanani nokuthi bakuqonda kanjani ukusebenza kwawo?
Lo mbuzo uyokwenza ukuba singabi ngabantu abagcwele ubuvila, nabathatha lokhu okuphambi kwabo kodwa sikwazi ukuzihlupha ngokufuna okungaphezulu kwalokhu esikwaziyo, nesikubo- nayo yonke imihla.
Le nselelo engiyiphonsayo ithi asingawujwayeli umhlaba sithi siyawazi kodwa asishisekele ukuwufunda kabanzi, sikujabulele ukuthola izinto ezintsha ezingasenza sizithole siphila kangcono kusasa kunanamhlanje.
Imibuzo engifisa uzibuze yona akuyona eyejwayelekile. Lokho kuzokubiza ukuba ufune ulwazi oluningi ngoba iqiniso lingukuthi akukuningi okwaziyo ngomhlaba esiwuphiwe njengento okulindeleke ukuba sibe ngamakhosi phezu kwayo. Asiqale ngomhlabathi okuyiwona omise umhlaba bese sizibuza ukuthi wona lo mhlabathi umi phezu kwani ngoba ngeke kwenzeke ukuba lo mhlabathi ulokhu uye phansi ngokujula okungenamkhawulo.
Kumele sizihluphe ngokuqonda ukuthi lo mhlabathi uqala kuphi, nokuthi yini eyenza ube namandla angaka okukwazi ukumisa isakhiwo somhlaba esimi phezu kwawo.
Singazibuza futhi umbuzo othi wakheka kanjani umhlabathi nokuthi yini eyenza ukuba ube yizinhlobo ezahlukene, lapho othola isibomvu kwenye indawo uthole osalubumba kwenye indawo, kube oyisihlabathi kwenye indawo, neminye eminingi engingeke ngayibala la.
Singaze sizibuze nokuthi wakheka kanjani umhlabathi ukuba ulungele ukutshalwa kohlobo oluthile lwezitshalo, kube kuwukuthi kukhona ezingeke zamila nhlobo kulowo mhlabathi, nobekungathi noma zikwazile ukumila kodwa kube wukuthi ngeke zikwazi ukukhula zibe yilokhu okulindeleke ukuba zikhule zibe yikho.
Uma uzozibuza ngomhlabathi nezinhlobo zawo, nokuthi zakheka kanjani, kuvele kube nokudideka okukhulu nokumangala uma ufika lapho ucabanga khona ngesihlabathi esitholakala olwandle, nokuyisona kuphela esimise ulwandle, ubuka nobuhle besihlabathi solwandle kodwa uthi uma usuka nje olwandle, uhamba ibanga elingengakanani uzithole ususemhlabathini owejwayelekile, ongenayo kwanhlobo into enokuthi isihlabathi siseduze kakhulu kwayo, kwazise ulwandle lubuqamama.
Ngiyazi ukuthi abantu bayaye bathi usuke ususezingeni lokuhlanyiswa ulwazi uma usuzibuza uhlobo lwale mibuzo engithi zibuze yona kodwa injongo yami wukuba ubone ukuthi besibekwe la emhlabeni nenselelo engakanani yokuwuqonda umhlaba ngoba ungowethu, siwuphiwe ngesihle.
Ukuhlupha imiqondo yethu ngokufuna ulwazi olujulile lwezinto esiphila kuzo, esiphila nazo nesiphila ngazo, kubaluleke kakhulu. Ziningi izincwadi okumele ngabe sizibhalile, ziveza okusha esikutholayo ngomhlaba esiphila kuwo. Ngihlangabeze ngesonto elizayo uzwe ukuthi ngiyokuholela kuluphi ulwazi. *Usbu Buthelezi ungumsakazi wokhozi FM. Abafisa ukuphawula noma ukuzwakalisa imibono yabo ngale ngosi, bayacelwa bathumele kwi-email ethi: abombuso@gmail. com noma kwi-facebook: I am Sbu Buthelezi, kwi-twitter:@ Iamsbubuthelezi nakwiInstagram:iamsbu Buthelezi
Kumele sizihluphe ngokuqonda ukuthi lo mhlabathi uqala kuphi nokuthi yini eyenza ube namandla...