KUTHANDAZELWE UBUGEBENGU KWADEDA
SEKUCACELE nengane encane ukuthi inkinga yokusetshenziswa bededengu kwezidakamizwa isisabalele nasezindaweni zasemakhaya.
Lokhu kuvele emthandazweni wokunxusa kumdali ukuba kuphele ubugebengu emphakathini wakwadeda enyakatho yetheku ebingolwesine ehholo lomphakathi Kwadeda.
Kulo mkhuleko obuhlelwe wubuholi bezombusazwe kuward 5 phansi kwenambithani Branch ye-african National Congress (ANC) bubambisene nobuholi bendabuko kubonakele ukuthi ayisengangabo, ukufa kwabantu bedutshulwa, wukudlwengulwa kwezingane nabadala, ukugqekezwa kwamakhaya, nokwebiwa kwemfuyo sekudinga umkhuleko.
Umfu Thulasizwe Shange nguye odlulise umyalezo wezwi lenkosi abewusekele ngesifundo asithathe encwadini kamphrofethi ujeremiya 9:17-18 lapho unkulunkulu ethi makumenywe abesifazane besililo abankophe zabo zigcwele izinyembezi, ukuba beze masinyane bazolila.
Endlalela intshumayelo yakhe umfu Shange ubalise ngesimo okuhlangenwe ngaso kule nkonzo yomkhuleko lapho nasezindaweni zasemakhaya bengasakwazi ukulala kungavaliwe ngama-burglar guard njengoba nakhona sekwaba nohlobo lwabantu okuthiwa ngamaphara.
Uqhubeke wathi kule mihla onengane akasazi ukuthi kumele athokoze noma enzenjani njengoba uma ingane yakhe isiphenduke isigebengu, uye angazi athini kongazele uma esebuza ukuthi ku- njani uma kunje. Emuva kwentshumayelo uhlelo lwale nkonzo lube nezikhulumi umongo wamazwi eziwabekile obumayelana nokuvuselelwa kwezimilo.
Obemele umnyango wamaphoyisa, uconst Thobani Msomi ozinze esiteshini samaphoyisa ensuze njengesikhulu sokuxhumanisa amaphoyisa nomphakathi, unxuse ukuba umphakathi ubambisane namaphoyisa ukuze umsebenzi wokulwa nobugebengu uphumelele. Ugcizelele ukuthi abantu abahlalise kabi umphakathi baphila nawo futhi bayaziwa ngakho kumele badalulwe.
Uconst Msomi ukhale ngezidakamizwa nama thaveni avula amahora eqile kwasemthethweni. Wenze isibonelo ngomunye umfundi owabanjwa ethengisa umthunzi wezinkukhu okuthe nxa ilandelwa indaba yakhe kwatholakala ukuthi usuke ethunywe ngunina! Waphetha ngokuthi ukuze uhulumeni anezele isibalo samaphoyisa kumele umphakathi uthintane nohulumeni ngemigudu efanele esikhundleni sokugxoba itoyitoyi okugcina sekungenelele kuyona nosayinyomfa.
Obemele umkhandlu wesizwe, induna, umnu Mgunyathi Makhanya, uthe uwuzwile umyalezo kamfu Shange othi akubizwe abesifazane besililo, wakhala ngokuthi nokho abesifazane abanjalo abasabonakali kulezi zinsuku, esikhundleni salokho yibo abavuna abantwana babo.
Wexwayisa umphakathi ngokuthi ngokuqhubeka kwezinto kanje, bazocela amaphoyisa enze umkhankaso wokukhipha izibha- mu, lapho owesifazane ofihlile ukuthi sikhona kuyobuywa naye elenga kwi-helicopter yamaphoyisa ikhanda libheke phansi. Laphoke kuhleke yonke indlu.
Ngasekugcineni kohlelo unkk Dolly Shandu oyiphini likasihlalo wesifunda sakwadukuza enhlanganweni YE-ANC ukhale ngohlobo lwamaphoyisa asesebenzisana nezigebengu, nokuthi uma kubikwa izehlo zobugebengu ivele iphelele emoyeni leyo ndaba kugcine kungaboshwe muntu.