Ungenziwa inkundla yosopolitiki okaray
KUSOBALA ukuthi inkosi isavakashele imboni yezokungcebeleka eningizimu Afrika. Iminyaka ilandelana, sivalelisa amaciko. Izwi lithi asingakhali njengabangakholwayo, sesiyolala ngalo inxeba yize libhibha.
Abaculi baletha injabulo nethemba ezizweni zonke, uma behamba kanjena kunzima ngoba ezimeni zosizi nenjabhiso basithoba amanxeba. Sibhonga emswanini emndenini karay Chikapa Phiri (70) obenekhono elingandile, osishiye kuleli sonto esiliphethayo ngemuva kokuxinwa yisifo somdlavuza wamaphaphu.
Bambalwa abaculi abanesiphiwo esifana nesakhe. Imvamisa kuleli lizwe lakithi siye sibize bonke abasendimeni yomculo ngabaculi, asibehlukanisi nabankenteza imilolozelo bengaculi ngqo. Sivele sithi bonke ngabaculi yize berepha abanye, singakaze sizwe bempongoloza sizwe imizwilili yamaphimbo abo.
Uray-ke yena ubengumculi nomdlali wezinsimbi eyiciko loqobo. Ubeqamba izingoma azipheke aphinde azicule yena, ubengujikelele. Ubengaqambi nje isinqamu sikagwayi asiphindaphinde size sibe wugabagaba lukasikilidi. Ubezinika isikhathi ayibhale ingoma, ayihlele, ayinonge ngazo zonke izinongo ayipheke ayephule agcine eyiphakele umphakathi.
Kuzoba nzima uma kungekho ozoqhuba lolu hlobo lokwenza kwezomculo kuleli. Kumanje kuleli zwe sibhekene nohlobo lwabaqambi bomculo abangomasheshisa wekhofi abafuna izinto ezisheshayo, abephula ukudla kungavuthiwe bakuphakele abantu.
Umculo sekuwugqumgqumu, kabusekho ubunyoninco. Asisayiphathi eyolwazi lomculo, kumnyama sikhona. Okudabukisayo ngukuthi nalabo abawufundele umculo bazithele ngabandayo, ababizi ngisho izimbizo zokuqeqesha intsha kwezomculo.
Izinga likaray belilingana neloLetta Mbulu, Caiphus Semenya, Soul Brothers, Hugh Masekela nabanye abayizingcweti zomculo woqobo, ohlalayo ezinhliziyweni zabantu hhayi ogqamcishi.
Silindele ukuba abantu baseningizimu Afrika baziphathe kahle emngcwabeni karay, bawunike isizotha esiwufanele.
Siyanxusa ukuba izikhulumi, zizilungiselele, zingankanti njengoba sihlale sibona kweminye imingcwabo yamaciko kuleli egcina iphenduke inkundla yosopolitiki yokukhankasa.
Abaphathi bohlelo abanikeze izikhulumi ithuba, bangajiki babe yizikhulumi bona. Awanqatshiwe amahlaya amafushane namakhorasi kodwa kuyisicefana uma umphathi wohlelo esezodla isikhathi yena.
Sinethemba lokuthi ngomgqibelo embombela Stadum, empumalanga, abantu bazoyihlonipha le ngqalabutho, bayivalelise ngesizotha.
Sithi bonke abantu maba "zwakale nganeno” bayovalelisa.