EZEMISAKAZO:
NGIKE ngaba nethuba lokuvakashela ivibe FM ohlelweni lwasekuseni, ibreakfast With A Difference muva nje, olushayelwa ngu-ayanda Ntuli.
Kungichazile engikufice kulesi siteshi - kusukela endleleni abasebenzisana ngayo nethimba lilonke ngokunjalo nemishini asebeyisebenzisa. Lokhu kungenze ngacabanga abaphathi abambalwa abengamele iziteshi zomphakathi Kwazulu-natal. Qaphela, ngizobalula abambalwa ngoba kuyibo engibazi kangcono ngamagalelo abo hhayi ngoba bengcono kunabanye.
Laba bengamele lezi ziteshi sengathi yizingane zabo uqobo. Khumbula phela ukuthi nakuba le misakazo kungeyomphakathi ngokobunikazi, kodwa idinga abaphathi abazoyigona, bayifukamele. Yibo-ke laba abagqamile.
Owokuqala nguyena umphathi wevibe FM umnu Lucky Dlamini. Kusukela ngiqala ukusazi lesi siteshi sisathola ilayisense yesikhashana, besenganyelwe nguye usibalukhulu.
Ngicabanga ukuthi naqale nabo bayahleka namuhla uma bebuka emuva, bebheka asebekuzuzile. Imishini engiyifice khona ingenze ngabona ukuthi usesebenzile impela. Nakuba ixhaswa le misakazo yizikhungo ezifana NOMDDA nomnyango wezokuxhumana kuhulumeni, kodwa konke kuncike ekukhuthaleni komphathi wesiteshi.
Ngicasukile ngelinye ilanga ngizwa isiteshi sivele sinqamuka emoyeni kwazise kakuseyona into ejwayelekile lena njengakudala kodwa ngaxola uma sengizwa ukuthi kungenxa yezigebengu zakwamashu ebezintshontshe amakhebuli kagesi.
Impela KUYISITAYELA UKULALELA ivibe FM ku-94.7 FM.
Owesibili ongigqamelayo ngokufukamela esakhe, ngumnu Sandile Ngema wembokodo FM eku-96.8 FM. Umlando nobunzima lesi siteshi esibhekane nabo phambilini kungagcwala ibhuku. Kusukela emibangweni, yizingxabano kubasebenzi kuze kube la sikhona manje njengoba sesizinze epinetown, umadlokovu ubephambili. Uwe evuka nembokodo FM, nokufakazelwa yindlela izisebenzi ezimkhonze nezimhlonipha ngayo.
Sesishintshashintshe kaningi izingqikithi zaso njengoba manje sigxile okholweni. Ongakaboni ukuthi IYIKHAYA NEKUSASA LESIZWE uyophaphama kudala.
Owesithathu ngumnu Vela Xulu. Uma usebenza embonini yezokusakaza ngeke ungamcabangi uxulu uma ukhuluma ngezwi Lomzansi elitholakala ku-98.0 FM. Ugxabhashe naye ubesesimeni esifanayo nalaba abanye, ewa evuka ikakhulukazi ngesikhathi besathola amalayisense esikhashana. Ungomunye wabambalwa kubaphathi osasebenza nengxenye eningi yethimba ebelikhona kusukela kusasakazelwa kwi- caravan nokwenza ubumbano phakathi kwabo luqine.
Kakungimangazi ukuthi namuhla baphambili ngokwezibalo zabalaleli Kwazulu-natal. Nabo bebelokhu beshintsha ingqikithi yabo kodwa le abayibambe manje yokugxila ezingxoxweni kubukeka ibasebenzela, yenza balalelwe ngabantu abaningi abanomthelela ekushintsheni kwempilo yabantu. Impela UZOWUZWA UMEHLUKO (Feel The Difference).
Owokugcina ngomunye kwabesifazane abayingcosana abengamele iziteshi zomsakazo. Lowo nguthandeka Msani Ngobese wenanda FM. Ngiqale ukwazi ngaye esasebenza kwesinye isiteshi somphakathi, idurban Youth Radio, kanti kuyacaca wayeyele ukuyoncela ulwazi khona. Anginasiqiniseko sokuthi umbono wokusungula esakhe isiteshi wamfikela kwenzenjani kodwa kwaba yisinqumo esiphusile lesi asithatha.
Sekuyiminyaka engamele lesi siteshi odidekayo uma usilalele njengoba iningi lezinhlelo lizwakala kangcono kunalezo ezikuma- commercial radio station.
Uthandeka udodile ngokuphatha lo msakazo nokufakazelwa wukuthi YISONA SITESHI ESIPHAMBILI NAMUHLA (Today’s Best Radio).
Kangikungabazi ukuthi laba baphathi bayalidinga ihlombe nokwesekwa ukuze le misakazo ngokunjalo neminye ingafadalali. Singawuthokozela nowakho umbono ngazo zonke ezithinta ezemisakazo. zowakha@ilanganews.co.za