EZOTHANDO:
KUNEZINTO okufanele ukuba niziqaphele uma nisothandweni futhi nibe nendlela yokubhekana nazo.
Imvamisa abantu ababili abathandanayo kabafani indlela abenza ngayo izinto, indlela abaphila ngayo, indlela yokuziphatha, izinto abazithandayo njalo njalo.
Kuyenzeka uthole ukuthi kuhlangene umuntu othanda ubumnandi nongazwani nhlobo nabo. Kuyenzeka futhi ukuba kuhlangane umuntu othanda ukuxoxa kakhulu ( talkative) noma ophaphile, nomuntu othulayo.
Ngesinye isikhathi kuhlangana umuntu okhuthele, ohlanzekile nomuntu oyinuku futhi oyivila. Ngesikhathi abantu besaqala ukuhlangana basuke bengakazani kahle, bese belokhu befundana ngokuhamba kwesikhathi.
Kuyenzeka-ke kube khona izinto oziqaphelayo ongazithandi ngomuntu wakho, mhlawumbe njengokuthi njalo uma evuka akawendluli umbhede, akakwazi ukuqoqa izinto endlini noma akakwazi uku- zenzela ukudla. Abanye-ke baye basheshe bathathe isinqumo sokushiya phansi ebudlelwaneni uma kukhona abangakuthandisisi noma ngabe belukhona uthando kodwa umuntu bese evele ecikeka.
Kuyahlupha-ke ukuvele usheshe ushiye ngoba kusho ukuthi uzolokhu ushintshashintsha abantu. Phela akukho soka lingenasici ( no one is perfect). Into esizayo ebudlelwaneni ngukuba uzinike isikhathi ufunde isinqandamathe sakho ukuthi siluhlobo luni lomuntu.
Uma kukhona izinto ongazithandi zisho, ungafeli ngaphakathi. Okulungisekayo zamani ukukulungisa. Ngokombiko oke washicilelwa kwiphephabhuku lesingisi, iglamour Magazine, zine izinto ezivame ukuba yinkinga ebudlelwaneni.
Ukuhlangana komuntu othanda ubumnandi nongabuthandi Njengoba sishilo ngenhla, lena yinto ejwayelekile. Umbiko waleli phephabhuku uthi kuvamile ukuba uma abantu besaqala uku- hlangana, uthando luselusha bazikhiphe baye ebumnandini kodwa kuthi lapho kuqhubeka isikhathi, sebejwayelene bese kushintsha ukwenza - omunye ahlale endlini, kuthi lona othanda ukujuxuza ahambe yedwa.
Uma sekunjalo-ke kuqala kube khona ongathokozile ngomunye, bese kusuka ukukhuluma okungaholela engxabanweni enkulu. Bathi ukugwema leyo ngxabano, zamani ukuhlala phansi nibonisane, nivumelane ngokuthi nihlangabezana kanjani ukuze nobabili nihlale nijabule.
Ningavumelana ngokuhamba ndawonye, kuthi ngesinye isikhathi nihlale endlini nobabili.
Umuntu ongazinaki izinto Kukhona umuntu ongazinaki izinto, ovele ahliphize nje ashiye kanjalo. Kunabantu abavele bavule ifriji bakhiphe amanzi baphuze bawaqede bengabe besathela amanye bawabuyisele efrijini.
Omunye akhiphe into ethile lapho ihlala khona angabe esayibuyisela lapho eyithathe khona. Lokhu yizinto ezincane kodwa ezicasulayo. Okungasiza uma unesinqandamathe esinjalo wukuba ungazinaki futhi ungavumi ukuba zikucasule.
Ukuxolisa
Kusemqoka ukuba uzehlise, uxolise uma wenze iphutha. Ukungakwazi ukuxolisa kungona ubudlelwano. Uma wenze iphutha, yamukela, uxolise. Ukwenza kanjalo kuyokwenza umaqondana wakho ukuba naye akhuthazeke, azehlise uma enze iphutha.
Ukushayiselana ngomoya Inkulu-ke indaba yokushayiselana ngomoya - ingabona ibuqede nya ubudlelwano. Wonke umuntu uyadinga ukuba yedwa ngesinye isikhathi, azithulele acabange izinyoni zakhe ( think and reflect).
Musa-ke wena ukufuna ukuhlale uyisimbelambela ngisho isidingo singekho - uma isithandwa sakho sidinga isikhathi sidedele, ayikho into embi ngalokho. Impela uma ninqobe lezi zinto ubudlelwano benu buzohamba kahle.