Loufi se debuutalbum is eindelik uitgereik
Sy liedjies is lankal gewild, en nou is dié rapper se debuutalbum eindelik hier
GAAN SÊ JOU MENSE
Al is Loufi se debuutalbum, Gan sê jou mense, nou eers uitgereik, is dié musikant en rapper al maande nie meer ’n vreemdeling in die plaaslike musiekbedryf nie. Die musiekvideo’s van enkelsnitte soos “Boude”, “Wit skoene” en “Baas vannie plaas” is al miljoene kere op YouTube gekyk.
“Ek het regtig nie woorde nie. Ek voel baie nederig wanneer ek dink dat mense meer as ’n miljoen keer na my liedjie wil luister,” vertel Loufi. “Kyk, mense gaan oor jou praat, of dit nou goeie of slegte praatjies is. Of dit oor my gaan of oor my musiek, mense gaan praat. So laat die tonge maar klap en ‘gan sê jou mense’,” sê hy.
Loufi, wat deesdae in Johannesburg woon, wil nie sy musiek in een genre plaas nie, maar die meeste van sy liedjies spog met ’n aansteeklike ritme. As hy die genre dus in een woord moet opsom, sal “vibe” sy musiek vasvang. “As ek saam met enige kunstenaar ’n liedjie doen, wil ek nie as ’n rapper uitblink nie; ek wil as ’n musikant uitstaan.”
VROEË BEGIN
Loufi, oftewel Jean-Luc Handel, het in die klein voorstad Young Park in Gqeberha grootgeword, en dit is ook uit sy kinderdae waaruit die bynaam Loufi spruit.
“Ek was al as kind mal oor rapmusiek, en ek het altyd vir my klein homeys gerap,” onthou Loufi. “Toe ek Eminem in die fliek 8 Mile (2002) sien, het ek dadelik geweet dié is wat ek vir die res van my lewe wil doen,” sê hy.
Maar dit is eers heelwat later in 2019, nadat Loufi as gehalte-inspekteur by sy destydse werkplek afgelê is, toe sy droom om musiek te maak ’n werklikheid begin word het. “Om afgelê te word het my gepush, want ek het geweet wat ek vir my lewe wil hê en wat ek wil doen,” vertel Loufi, wat ses maande daarna ’n platekontrak losgeslaan het.
Om die musiekvideo vir sy liedjie “Ek is broke” te finansier, het hy sy motor verkoop. “Musiek is al 10 jaar ’n deel van my lewe, so toe ek eindelik daardie geleentheid kry, was dit ’n groot verligting.”
DIE LIEDJIESKRYFPROSES
Wanneer die inspirasie kom klop, skryf Loufi op die plek ’n paar lirieke neer en rond dit daarna in die ateljee af. “Ek neem dan my idees oor ’n random beat op en stuur dit aan een van die musiekvervaardigers saam met wie ek gereeld werk,” vertel hy. Die meeste van hierdie album se liedjies is deur Levin Adams en Jayms vervaardig.
“Hulle bou dan die beats en create die vibes, en daarna besluit ons saam watter dele werk en watter dele ons moet uitsny.”
BEKENDE STEMME
’n Hele paar opwindende samewerkings met groot name in die bedryf verskyn op hierdie album en sal luisteraars verras. Aanhangers van Loufi se energieker treffers sal hou van “Liquorman” saam met Jack Parow en Jayms, en “BIG BIG BIG” saam met Early B, terwyl die nostalgiese ballade “Lang pad”, ’n duet saam met die The Voice SA-wenner Tasché, ’n rustiger gevoel by die luisteraar sal meebring.
“Elke kunstenaar wat op die album verskyn, was premeditated. Wanneer ek met ’n liedjie klaar was, het ek net geweet, hierdie liedjie skree Jack Parow en dié een skree Early B,” vertel Loufi.