’nSeuntjievirdieTindalls
Die koms van die Zara en Mike Tindall se seun bring ’n bietjie goeie nuus vir die koningshuis
NIKS klop die glimlag wat ’n pasgebore baba op mense se gesigte plaas nie – en die hemel weet, die koninklike familie kan doen met goeie nuus.
Sedert prins Harry en sy vrou, Meghan, se berugte onderhoud verlede maand met Oprah Winfrey moes die Buckinghampaleis links en regs vure doodslaan.
Toe koningin Elizabeth se jongste agterkleinkind dus onlangs ’n haastige verskyning maak, was almal in die wolke – veral met dié dat die kleinding se ouers hulde gebring het aan die verswakte hertog van Edinburgh deur hul seun na hom te noem.
Lucas Philip Tindall is die 22ste aanspraakmaker op die Britse troon, Zara en Mike Tindall se eerste seun en kleinboet vir Mia (7) en Lena (2).
En waar is die jongste lid van die bloubloedfamilie gebore? Op ’n gimnasiummat op ’n badkamervloer – net weer ’n bewys dat babas nie enigeen se reëls volg nie.
In die aanloop tot die geboorte is omtrént gegis oor waar Zara (39) sou kraam. Prinses Anne se enigste dogter is ’n plattelandse meisie en voel meer tuis tussen perde en honde as in die byderwetse kringe van Londen.
Die deftige Lindo-vleuel by die St. Mary’s Hospital (waar Catherine, die hertogin van Cambridge, se kroos gebore is) of die weelderige Portland-hospitaal (waar prinses Eugenie en Meghan geboorte gegee het) was nie vir haar nie. Haar keuse was die Gloucestershire Royal Hospital 15 minute van haar gesinshuis af.
Dié gratis staatshospitaal is waar Zara se dogters gebore is en was dus die voor die hand liggende keuse – maar eindelik was dit nie vir die jongste Tindall beskore nie.
Mike (42) het nie geskroom om die besonderhede van die blitsvinnige geboorte op sy podsending, The Good, the Bad and the Rugby, te deel nie – en met alles wat hy gedeel het, hoop ons maar hy het vroulief se toestemming gekry!
ZARA het die vorige aand kraampyne begin kry, en sy en Mike het oppassers vir Mia en Lena gereël. Maar klein Lucas het so vinnig sy opwagting gemaak dat hulle nie die hospitaal gehaal het nie. “So ja, dit was ’n geval van haas jou na die tuisgim om ’n mat te kry, hol badkamer toe, plaas die mat op die vloer, sit die handdoeke neer en berei jou voor vir wat kom,” het Mike vertel.
Gelukkig het hulle hulp in die vorm van Zara se jare lange beste vriendin, Dolly Maude, gehad.
Sy was – nes met Mia en Lena se
geboortes – teenwoordig by klein Lucas s’n.
Dolly was die strooimeisie by die Tindalls se troue in 2011, en volgens haar LinkedIn-profiel het sy 13 jaar as kraampraktisyn gewerk.
“Sy was baie belangriker as ek,” het Mike gesê. “Sy was daar en het besef ons sal nie die hospitaal betyds haal nie. Gelukkig was die vroedvrou wat ons by die hospitaal sou ontmoet het nie ver nie. Sy het tot by ons huis gery en het daar opgedaag toe ons in posisie kom vir die geboorte, en toe daag die tweede vroedvrou op net toe die kop uitsteek.”
Mike het aan sy medeaanbieders van die podsending, die oudrugbyspelers Alex Payne en James Haskell, vertel hoe hy net die naelstring geknip het en dadelik sy pasgebore seun na die TV-kamer geneem het om sport te gaan kyk.
“Dis die beste ding van tuis wees: Die oomblik toe hy toegedraai is, het ons die vel-tot-vel-ding gedoen. Ek het afgegaan televisiekamer toe, die TV aangesit en gesê dis wat ek en jy nou gaan doen.
“Daar was ’n stokou rugbywedstryd op – Bath teen Wigan – en ek dink toe, kom ons kyk eerste hierna, en daarna het ek na gholf oorgeskakel.”
Zara, vir wie Mike as ’n “vegter” beskryf, is duidelik ’n sterk vrou: Sy het die volgende dag met haar pasgebore baba gaan stap.
Ná Mia se geboorte in 2014 het Zara twee miskrame gehad voor sy in 2017 swanger geraak het met Lena, en sy en Mike het albei gehoop vir ’n seuntjie om hul gesin te voltooi. Daar is “dus baie blydskap”, het ’n koninklike bron gesê.
Vanjaar was egter nie net rooskleurig vir die gesin nie. Mike het onlangs die nuus gehaal toe dit uitkom sy maatskappy het geëis by ’n skema van die Britse regering wat ondernemings help wat ty- dens die pandemie swaar getrek het.
Sy onderneming, Kimble Trading, wat al sy sakebelange en verpligtings hanteer, het ’n verklaring tydens die kruin van Engeland se tweede golf uitgereik.
“Die uitbreek van covid-19 en daaropvolgende beperkings wat ingestel is, het daartoe gelei dat ’n aantal geleenthede in 2020 gekanselleer is,” lui dit. “Die onderneming het alle beskikbare staatshulp benut om die onderneming en sy werknemers deur die krisis te ondersteun.”
Mike is na raming R325 miljoen werd; daarom het die aansoek nie goed afgegaan nie. “Dis vermetel van Mike Tindall om geld uit die publiek se beursie te neem,” het die politikus Nigel Mills gesê.
Die reaksie was selfs erger op Twitter, waar een gebruiker Mike as ’n “immorele, gewetenlose vuilgoed” bestempel het.
’n Woordvoerder vir die onderneming het gesê Mike het persoonlik geen geld uit die toelae ontvang nie, maar weier om nog vrae daaroor te beantwoord.
MIKE het nie die omstredenheid gepak nie, maar het kort voor klein Lucas se geboorte in ’n onderhoud met The Times oor sy finansiële bekommernisse gesels. “’n Mens bekommer jou altyd oor geld,” het hy gesê. “Ek was baie gelukkig om ’n paar ambassadeursrolle by borge te kry, en jy weet dus daar is geld wat inkom. Maar borgskappe duur nie vir altyd nie.
“Jy moet beplan, en met ’n derde baba
op pad en skoolgeld en rekeninge om te betaal . . . ”
Mike het in Julie 2014 beroepsrugby vaarwel toegeroep en het die daaropvolgende ses maande, toe hy skielik elke dag “nêrens gehad het om heen te gaan nie”, beskryf as “nie pikdonker nie, maar met tye beslis bewolk”.
Hy het intussen sukses behaal as ’n geleentheidspreker wat mense vermaak met staaltjies uit sy rugbydae en kykies na sy lewe as deel van die koninklike familie.
Zara ontvang glo nie ’n sent uit die koninklike begroting nie, maar die Olimpiese perderuiter verdien sowat R41 miljoen per jaar danksy winsgewende borgskappe deur onder meer Samsung, Land Rover, die buitemuurse kleremaatskappy Musto, die beleggingsfirma Artemis en Rolex-horlosies.
Die Tindalls woon in ’n plattelandse huis op die Gatcombe Park-landgoed in Gloucestershire waar prinses Anne en haar tweede man, die afgetrede vlootoffisier Timothy Laurence, ook woon.
Zara se broer, Peter Phillips, het ook ’n huis op die landgoed, naby sy vervreemde vrou, Autumn, en hul dogters, Savannah (10) en Isla (8).
“Ons woon saam in ’n borrel op ’n plaas, en dis wonderlik om altyd by jou familie te wees,” het Mike vroeër vanjaar oor die lewe tydens die inperking gesê.
“Daar is niks anders om te doen as om op staptogte te gaan nie. Dis gelyktydig wonderlik en vreemd.”
En nou het hy natuurlik ’n seun om saam met hom na sport te kyk – of die kleinding daarvan hou of nie.