GEBROKE OOR SY WIL SKEI
Ek is gebroke hier waar ek vir jou skryf. My vrou van meer as ’n dekade wil skielik skei. Ons het onlangs die soveelste keer probeer om van voor af met ons verhouding te begin, maar sy toon geen belangstelling nie. Ek is ontsettend lief vir haar. Sy meen sy het haar liefde vir my verloor en dink berading gaan nie help nie. Sy wil ook nie aan haarself werk nie. Hoe kom ek oor hierdie tragedie? M op S
Niemand trou met die idee om te skei nie. Huweliksbeloftes is iets waaraan vele van ons vashou selfs lank nadat ons weet die liefde het opgedroog en die huwelik is verby. Maar ontkenning is ’n onnodige slaanstok en maak dit vir ’n mens moeilik om die werklikheid onder die oë te sien.
Hoe kan jy jouself oortuig dit is wel verby? Daar is tekens waarop jy kan let: Julle deel nie meer besluite oor die toekoms soos om saam ’n nuwe motor te koop nie; sy gesels nie meer spontaan met jou nie en luister ook nie na jou behoeftes nie. Nog ’n gevaarteken is as daar nie meer vervullende seks is nie. As jul doelwitte begin verskil en sy verskonings maak om nie by jou te wees nie, sal die huwelik selfs met berading moeilik gered kan word.
Moenie jou gevoelens geringskat nie. Gesamentlik is dit ’n bondel gevoelens soos ’n trein wat op jou afstorm. Skei dit van mekaar deur die gevoel van die oomblik ’n naam te gee soos “dit is woede; dit is rou” sodat jy dit kan verwerk.
Moenie wag tot die egskeiding afgehandel is voor jy met iemand praat oor hoe om dié ingryping te verwerk nie. As jy nie ’n berader wil spreek nie, maak jou hart teenoor vertrouelinge oop. Om die skeiproses minder pynlik vir jou te maak, stel ek gesamentlike bemiddeling voor sodat julle met ’n voorbereide skikking hof toe kan gaan. Dit is moeilik en hartseer, maar minder seer as om in ’n geding teenoor mekaar te staan te kom. Afsluiting kom ook makliker as die manier waarop julle uitmekaargaan nie ekstra hartseer veroorsaak nie.