Ons vakansiespeellys vir partytjies en lofsang
Vir die meeste is dit nog vakansie. Dié musiek sal nie net die partytjie aan die gang hou nie; dit bevat ook ’n lofprysingsalbum om dankie te sê vir die seëninge van die afgelope jaar
STERKER RIANA NEL
Dié nuwe enkelsnit van die gelyknamige album moedig ’n mens aan om self die interne groeiproses aan te pak. Almal moet deur fases in hul lewe gaan om sterker aan die ander kant uit te kom. Dié liedjie is ook die temalied van Huisgenoot en kykNET se nuwe fliek, Vergeet my nie, wat van Valentynsdag te sien is.
40 JAAR LIEDJIEBOER INNI LANGPAD
ANTON GOOSEN
Wat ’n wonderlike en nostalgiese luister na hoe Anton sy 40 jaar in die plaaslike musiekbedryf vier. Van sy groot treffers, soos “Josie Josie”, “Boy van die Suburbs” en “Gansbaailapa”, is ingesluit, maar ook nuwes soos “Skippietjie skommel”. Dié album is ’n moet vir jou Goosen-versameling.
DIE VENTERTJIES
Dié album sal die vakansie beslis by heelwat langarm-opskoppe gespeel word. Dis immers een van die topverkopers op die Musica-trefferlys. Die kitaarduo se ritmiese verwerkings van boeremusiek- en kommersiële treffers is baie gewild. Die bonussnit, “Jive bunny boere-keurspel” saam met Fatman, is ’n lekker verrassing.
IN BETWEEN THE LINES RISE IN RED
Die album volg op hul 2019-enkelsnituitreiking met dieselfde naam waarvan die musiekvideo meer as 30 000 kyke gekry het. Dié alternatiewerockgroep van Bloemfontein is nuut op die kringloop, maar moet beslis dopgehou word. Veral die snit “Voices” kry aftrek by hul optredes. Aanhangers van harde rock sal nie teleurgesteld wees nie.
VARSTRAP VERSKEIE KUNSTENAARS
Dié is ’n lekker saamgestelde album wat die vakansie stukkend gespeel kan word op partytjies. Die deurlopende tema is langarmdansmusiek. Laat die voete jeuk met liedjies soos “Lekker ou Jan” (Klipwerf), “Ek en my meisie” (Fatman), “Hantam-opskop” (Die Ventertjies) en “Fynloop-setees” (Kosie Beukes).
MY SIMFONIE VALESKA MULLER
Drie enkelsnituitreikings vanaf dié debuutalbum is reeds radiogunstelinge. Gaan die album dieselfde pad volg? Die 18 elektroniese pop-danssnitte met ondertone van housemusiek beproef verskeie klanke wat dalk vreemd vir sommige sal wees. Die jongklomp op die klubtoneel is egter gaande hieroor.
GOOCHY ROKKIE DIRK VAN DER WESTHUIZEN
Hierdie popliedjie met sterk elektroniese klanke is deur die DJ Skeady vervaardig. Die gevolg is ’n technogedrewe en ritmies lewendige dansliedjie wat gou op die trefferparades sal klim. Die liedjie gaan oor ’n verleidelike poppie wat met haar “goochy rokkie” op die strand loop. Sy werk met ’n plan . . . maar luister maar self.
WAARDIG IS DIE HEER WILLIE EN NATASHA
’n Geestelike album met bekende aanbiddingsliedere soos “My koning Heer”, “Hoe groot is U”, “Ons Koning kom” en “Oorwinningslied”. Hierdie sang- en huwelikspaar se nuutste album bring beslis ’n geestelike ervaring wat jou sal raak. Die kassie sluit ook ’n liriek-DVD in wat tydens lofprysingsgeleenthede gebruik kan word.S