EGSKEIDING EN JOU FINANSIES
Hier is vyf wenke om kop bo water te hou nadat jou huweliksbootjie op die rotse beland het
O M TE skei is vir die meeste mense emosioneel uitmergelend; daarom wil hulle die proses sou gou moontlik agter die rug kry – al beteken dit hulle kom eindelik die slegste daarvan af.
Onthou, jou toekoms (en dalk jou kinders s’n) is op die spel; wees sterk, al is die vooruitsig van uitgerekte onderhandelings erg.
1 Onderhoud as eks sterf
As jou eks sterf, sal jul minderjarige kinders outomaties vir onderhoud teen die boedel kan eis, maar nie jy as gewese gade nie. Onderhoudsverpligtings teenoor ’n gewese eggenoot hou op sodra die betaler sterf, sê David Thomson, ’n regsadviseur van Sanlam Trust. Hoe nou?
Die oplossing: Sorg die egskeidingsbevel stippel uit dat onderhoudsverpligtings teenoor jou as voormalige eggenoot ook op jou eks se boedel bindend sal wees. ’n Eenmalige bedrag gegrond op jou lewensverwagting kan byvoorbeeld uit jou eks se boedel aan jou betaal word.
2 Voordele en inflasie
Maak seker die egskeidingsbevel gelas dat alle uitkerende voordele, soos onderhoud vir jou en jul kinders, aan inflasie gekoppel word. Dis belangrik om te onthou jaarlikse inflasie op mediese en opleidingsonkoste is selfs hoër as die inflasie op byvoorbeeld kos- en petrolpryse. Raadpleeg ’n finansiële adviseur of rekenmeester om vir jou akkurate vooruitskat- tings oor hierdie kostestygings te doen.
3 Eks se aftreefonds
Jy is moontlik geregtig op ’n deel van die spaargeld in jou eks se aftreefonds, mits julle binne gemeenskap van goedere getroud is of buite gemeenskap met die aanwasbedeling. (As jy met aanwas getroud is, beteken dit alles wat julle tydens jul huwelik versamel, behoort aan julle albei.) Jou eks moet steeds lid van die voorsorg-, pensioen- of bewaringsfonds wees op die datum dat die egskeiding bekragtig word.
Om bindend te wees, moet die fonds – nie die eks wat lid is nie – beveel word om die uitbetaling te doen. Die bevel moet uitstippel presies hoeveel jy van jou eks se pensioenfonds kry. Maak seker die betrokke pensioenfonds se naam is reg in die bevel.
Die persoon wat die aftreefondsuitbetaling ontvang, is die een wat die belasting daarop betaal.
As jy en jou eks ooreenkom op ’n vaste bedrag van sy pensioenfonds, maak seker die belasting is ingesluit.
Jy as nielid moet seker maak jou eks se pensioenfonds kry wel die egskeidingsbevel.
Polisbegunstigdes 4
Enige voordele wat jy van jou eggenoot se lewens- en uitkeerpolisse ontvang, moet korrek in die egskeidingsbevel beskryf word.
As jy ’n nuwe begunstigde van jou eks se polis is, moet ’n nuwe begunstigdebenoemingsvorm by die betrokke lewensversekeraar ingedien word, verduidelik David.
En wanneer jy skei en jou eks as begunstigde van jou lewenspolis wil verwyder, moet jy dit self by die betrokke versekeraar laat verander. Laat jy na om dit te doen, sal jou eks steeds die begunstigde wees – al was dit nie die plan nie.
As minderjarige kinders jou polisbegunstigdes is en jy sterf, sal dit waarskynlik aan jou eks as hul wettige voog uitbetaal word. Dis omdat die oorlewende ouer outomaties die minderjarige se wettige voog word – ongeag die bepalings van die egskeidingsbevel of toesigooreenkoms. Hoe gemaak as jy nie wil hê jou eks moet dié uitbetaling (asook die opbrengs uit ander bates soos eiendom) beheer ná jou dood nie?
’n Testamentêre (tree in werking ná jou dood) of lewende (word geskep terwyl jy leef) trust vir jou minderjarige kinders, is David se raad. Die geld word aan die trust betaal en jy kan die trustees kies.
5 Kry dít agtermekaar
Hoe meer inligting jou prokureur oor jou en jou amper-eks se geldsake het, hoe makliker sal dit vir hom of haar wees om ’n goeie skikkingsooreenkoms op te stel.
As jou eks byvoorbeeld die korttermynversekering op jul huisinhoud betaal of betaal het, moenie aanvaar dit sal vorentoe steeds gedoen word nie. Jy sal dalk nuwe versekering moet reël vir jou motor en huisinhoud.
Onthou om jou testament te verander. Regtens het jy ’n grasietydperk van drie maande ná jou egskeiding om dit te doen.
As jy in daardie drie maande sterf sonder dat jy jou testament verander het, word aanvaar jy wou dit wel nog gedoen het. Dan sal jou eks bes moontlik nie erf nie.
Maar as jy ná die grasietydperk sterf sonder dat jy daarby uitgekom het om jou testament te verander, sal jou eks erf. BRON: STATISTIEKE SUID-AFRIKA: EGSKEIDINGS IN 2015, GEPUBLISEER 5 JULIE 2017