KÊREL MORS MET HAAR EMOSIES
Ek bevind my in ’n hartverskeurende situasie. Vandat ek op 19 swanger geraak het, het ek en my kêrel net ’n aan-af-verhouding. In die vier jaar dat ons saam is, het hy my emosioneel verniel.
Ek kan eerlikwaar sê ek wil regtig van alles vergeet en aangaan met my lewe, maar ons deel ’n pragtige seun. My kêrel het my al soveel hoop gegee, maar dan weer net teleurgestel. Ek het al van myself vergeet en doen nie meer moeite om mooi aan te trek en my te grimeer nie. Dink jy dis tyd dat ek liewer op myself konsentreer? SKL op KV
Lewensmaats los mekaar om verskeie redes. As ’n patroon vorm, kan ’n mens begin oplet na hoe jy verhoudings hanteer en watter maats jy kies.
’n Moontlike rede is dat ’n mens se emosionele band met ’n lewensmaat mettertyd verswak. Dikwels raak ’n ma so ingestel op ’n baba dat haar maat voel hy word nie waardeer nie. Die twee begin uitmekaargroei, want hulle het minder tyd om werklik saam te wees en hul prioriteite begin van mekaar verskil.
Wanneer maats min gemeen het, is dit maklik om aparte lewens te begin lei. Die liefdesband moet voortdurend gekoester en gevoed word; dit gaan nie vanself sterker word nie.
Met kinders se koms gebeur dit ook dikwels dat ’n vrou haar lewensmaat meer soos ’n broer begin behandel. Die eens romantiese verhouding word soos ’n gesinsverhouding. Alles gaan goed en gemaklik, maar die liggaamlike bande raak ál swakker. Dit is die begin van enige verhouding se einde.
Vergewe jouself vir wat jy anders sou wou gedoen het. Dis belangrik dat jy nou selfondersoek instel en met meer begrip en vrede in jou dalk ’n volgende verhouding aanpak.
Skuif die vrees eenkant toe dat die geskiedenis hom sal herhaal deur doelbewus ’n verhoudingsmaat te kies wat van jou voriges verskil. Baie sterkte; jy kan hierdie kringloop verbreek.